ترک دنیا کا اتحاد مزید مضبوط ہوگا، کرغز صدر

انقرہ (تر کیہ خبر) کرغزستان کے صدر صادر جاپاروف نے کہا ہے کہ انہیں توقع ہے کہ ترک دنیا کے درمیان اتحاد مزید مضبوط ہوگا۔ انہوں نے یہ بیان ترک صدر رجب طیب اردوان سے ’’سپریم آرڈر آف دی ترک ورلڈ‘‘ کا اعزاز وصول کرنے کے بعد دیا۔اردوان نے یہ اعزاز انقرہ کے صدارتی کمپلیکس میں منعقدہ سرکاری عشائیے کے دوران جاپاروف کو پیش کیا۔ عشائیے کا اہتمام 29 اکتوبر کی یومِ جمہوریہ تقریبات اور تنظیمِ ترک ریاستوں کے سربراہی اجلاس کے موقع پر کیا گیا تھا، جس میں دورے پر آئے سربراہانِ مملکت نے شرکت کی۔اعزاز کی تقریب سے خطاب کرتے ہوئے صادر جاپاروف نے کہا کہ انہیں یقین ہے کہ ترک دنیا کا اتحاد مسلسل مضبوط ہوتا رہے گا۔انہوں نے کہا کہ صدیوں پر محیط مشترکہ ثقافت اور بھائی چارہ انہیں ایک دوسرے سے جوڑتا ہے، جبکہ اپنے آباؤ اجداد کی قیمتی روایات اور اقدار کو آئندہ نسلوں تک پہنچانا ان کی ذمہ داری ہے۔