ترک دنیا اتحاد و بھائی چارے سے ’’ترک صدی‘‘ کا خواب پورا کرے گی، اردوان

استنبول ( تر کیہ خبر) ترک صدر رجب طیب اردوان نے کہا ہے کہ ترک دنیا مکمل یکجہتی، باہمی احترام اور بھائی چارے کے ذریعے آنے والے دور کو ’’ترک صدی‘‘ بنانے کی کوشش کرے گی۔انقرہ میں تنظیمِ ترک ریاستوں (او ٹی ایس) کے رہنماؤں کے اعزاز میں عشائیے سے خطاب کرتے ہوئے اردوان نے یقین ظاہر کیا کہ مشترکہ کوششوں سے ترک دنیا اس مقصد میں کامیاب ہوگی۔ترکیہ میں تنظیمِ ترک ریاستوں کا 13واں سربراہی اجلاس جمعرات اور جمعہ کو ’’ترک صدی: زبان، فکر اور عمل میں اتحاد‘‘ کے عنوان سے منعقد ہو رہا ہے۔ اجلاس میں علاقائی تعاون، رکن ممالک کے درمیان یکجہتی کے فروغ اور ترک دنیا کے وژن 2040 کو آگے بڑھانے پر غور کیا جا رہا ہے۔2009 میں قائم ہونے والی تنظیمِ ترک ریاستوں کے مستقل ارکان میں ترکیہ، آذربائیجان، قازقستان، ازبکستان اور کرغزستان شامل ہیں، جبکہ ترکمانستان، ہنگری، شمالی قبرص کی ترک جمہوریہ اور اقتصادی تعاون تنظیم مبصر کی حیثیت رکھتے ہیں۔