ترکیہ معیشت عالمی جھٹکوں کا مقابلہ کرنے کی صلاحیت رکھتی ہے: مرکزی بینک

استنبول ( ترکیہ خبر)استنبول میں منعقدہ تیسری عالمی اسلامی معیشت سمٹ کے دوران ترکیہ کے مرکزی بینک کے گورنر فاطح کارہان نے کہا ہے کہ ترکیہ کی معیشت مضبوط مالیاتی ڈھانچے اور کرنٹ اکاؤنٹ خسارے میں بہتری کی وجہ سے شدید عالمی معاشی جھٹکوں کا مقابلہ کرنے کی بہتر پوزیشن میں ہے۔میڈیا رپورٹس کے مطابق انہوں نے اجلاس کے دوران کہا کہ کم افراطِ زر ایک مستحکم اور قابلِ پیش گو سرمایہ کاری ماحول کے لیے بنیادی حیثیت رکھتا ہے، کیونکہ اس سے مالی اداروں کو طویل مدتی اور کم شرح سود پر مالی مصنوعات پیش کرنے میں سہولت ملتی ہے۔گورنر نے کہا کہ مرکزی بینک کی ترجیح پیداواری سرمایہ کاری کو فروغ دینا ہے تاکہ معیشت زیادہ مستحکم اور خوشحال بن سکے۔انہوں نے اسلامی مالیاتی نظام کے کردار پر روشنی ڈالتے ہوئے کہا کہ یہ نظام مالی شمولیت کے حوالے سے بڑی اہمیت رکھتا ہے اور بینکاری نظام میں ایک متبادل ذریعہ فراہم کرتا ہے۔ان کے مطابق چھوٹے اور درمیانے درجے کے کاروباری اداروں کے قرضوں میں اسلامی مالیاتی یا مشارکتی نظام کا حصہ نمایاں ہے، کیونکہ کئی کاروبار روایتی بینکاری کے ذریعے قرض حاصل نہیں کر سکتے لیکن اس متبادل نظام سے فائدہ اٹھا سکتے ہیں۔انہوں نے بتایا کہ ترکیہ میں مشارکتی مالیات کا حصہ مجموعی اثاثوں میں 2010 کی دہائی کے آغاز میں تقریباً ساڑھے چار فیصد تھا جو اب بڑھ کر تقریباً نو فیصد تک پہنچ چکا ہے، جو اس شعبے کی مسلسل ترقی کو ظاہر کرتا ہے۔فاطح کارہان نے مزید کہا کہ مشارکتی بینکوں میں کریڈٹ گروتھ روایتی کمرشل بینکوں کے مقابلے میں زیادہ مضبوط رہی ہے، اور مرکزی بینک اس نظام کے لیے خصوصی مالیاتی آلات اور لیکویڈیٹی مینجمنٹ ٹولز پر بھی کام کر رہا ہے تاکہ دونوں نظاموں میں ہم آہنگی پیدا کی جا سکے۔انہوں نے کہا کہ ترکیہ کی معیشت تاریخی طور پر تیز رفتار ترقی کے دوران کرنٹ اکاؤنٹ خسارے کا شکار رہی ہے، جس کی وجہ سے یہ بیرونی جھٹکوں کے لیے حساس رہی ہے۔ان کے مطابق عالمی سپلائی چین بحران، کووڈ انیس کی وبا، روس۔یوکرین جنگ اور مشرق وسطیٰ کے تنازعات جیسے واقعات نے مرکزی بینکوں کے لیے چیلنجز بڑھا دیے ہیں۔انہوں نے کہا کہ ایسی صورتحال میں مالی ذخائر، زرمبادلہ کے مضبوط ذخائر اور کرنٹ اکاؤنٹ خسارے میں کمی جیسے عوامل معیشت کو استحکام فراہم کرتے ہیں۔آخر میں انہوں نے کہا کہ حالیہ اعداد و شمار کے مطابق ترکیہ کی معیشت عالمی جھٹکوں سے نمٹنے کی بہتر صلاحیت رکھتی ہے اور موجودہ مالیاتی بفرز بحرانوں کے اثرات کو کم کرنے میں مددگار ثابت ہو رہے ہیں۔