2028 سے ترکی نیٹو کی “الائیڈ ری ایکشن فورس” کی قیادت کرے گا

انقرہ( ترکیہ خبر) ترکی نے اعلان کیا ہے کہ 2028 سے وہ نیٹو کی الائیڈ ری ایکشن فورس (Allied Reaction Force - ARF) کی قیادت سنبھالے گا، جس سے یورپی سلامتی کے ڈھانچے میں اس کا کردار مزید اہم ہو جائے گا۔نیٹو کے ڈیٹرنس اینڈ ڈیفنس تصور کے تحت ترکی ان چند ممالک میں شامل ہو گیا ہے جو عملی سطح پر تیز رفتار ردعمل دینے والی فورسز کو کمانڈ اور تعینات کرنے کی صلاحیت رکھتے ہیں۔ترکی نیٹو کے آئندہ سربراہانِ مملکت و حکومت کے اجلاس کی میزبانی بھی کرے گا اور اتحاد کو تقریباً 3,000 فوجی اہلکاروں کے ساتھ ساتھ مختلف ہتھیاروں، گاڑیوں اور عسکری پلیٹ فارمز کی صورت میں معاونت فراہم کر رہا ہے۔نیٹو (NATO) 4 اپریل 1949 کو قائم کیا گیا تھا، جس کا مقصد سرد جنگ کے دوران سوویت یونین کے خطرے کے خلاف اجتماعی دفاع کو یقینی بنانا تھا۔ یہ اتحاد اقوام متحدہ کے چارٹر کے آرٹیکل 51 کے تحت اجتماعی دفاع کے اصول پر قائم ہے۔ترک وزارت دفاع کے ذرائع کے مطابق ترکی کی نیٹو میں شمولیت کی بنیادی وجہ سوویت یونین کی جانب سے آبنائے ترکی اور مشرقی علاقوں سے متعلق خطرات کا توازن قائم کرنا تھا، جس کے باعث ترکی نے مغربی دفاعی اتحاد میں شمولیت اختیار کی۔