ترکیہ، لیبیا میں سیاسی و عسکری اتحاد کیلئے کوششیں تیز
استنبول( تر کیہ خبر) سکیورٹی ذرائع کے مطابق ترکیہ کی قومی انٹیلی جنس تنظیم کے سربراہ ابراہیم قالن نے جمعرات کو لیبیا کی مجلس نمائندگان کے اسپیکر عقیلہ صالح اور لیبیا کی اعلیٰ ریاستی کونسل کے صدر محمد تکالہ سے ملاقات کی۔ملاقات میں لیبیا اور خطے کی صورتحال، دونوں ممالک کے درمیان تعاون مزید بڑھانے کے اقدامات، جبکہ لیبیا میں سیاسی و عسکری اتحاد کے قیام اور استحکام برقرار رکھنے کی کوششوں پر تبادلہ خیال کیا گیا۔فریقین نے طویل عرصے سے حل طلب معاملات میں مستقل پیش رفت کے طریقوں اور تمام فریقین کے درمیان وسیع اتفاق رائے پیدا کرنے کی کوششوں پر بھی بات چیت کی۔ملاقات کے دوران لیبیا میں استحکام کے قیام اور سیاسی عمل کو آگے بڑھانے میں اعلیٰ ریاستی کونسل اور مجلس نمائندگان کے اہم کردار پر زور دیا گیا۔