ترکیہ میں جنگی صحافت کی تربیت کا 30واں پروگرام شروع

استنبول( تر کیہ خبر) جنگی علاقوں، قدرتی آفات اور ہنگامی حالات میں فرائض انجام دینے والے صحافیوں کو مشکل حالات میں محفوظ انداز سے رپورٹنگ کے لیے تیار کرنے کے مقصد سے انادولو نے جنگی صحافت کے تربیتی پروگرام کا 30واں مرحلہ شروع کردیا۔12 روزہ تربیتی پروگرام ترکیہ کی پولیس اکیڈمی اور ترک تعاون و رابطہ ایجنسی کے اشتراک سے منعقد کیا جارہا ہے۔تربیت میں 25 صحافی شریک ہیں، جن میں انادولو کے 9 کارکن جبکہ لاؤس، ملائیشیا، ویتنام، کمبوڈیا، فلپائن، انڈونیشیا اور پاپوا نیو گنی سے تعلق رکھنے والے 16 صحافی شامل ہیں۔انقرہ میں افتتاحی تقریب سے خطاب کرتے ہوئے انادولو کے انتظامی و مالی امور کے نائب ڈائریکٹر جنرل اوغوز انیس پیرو نے بتایا کہ پروگرام کے گزشتہ 29 مراحل میں 654 مقامی اور بین الاقوامی میڈیا ماہرین تربیت حاصل کرچکے ہیں۔انہوں نے کہا کہ تربیت میں جنگ کے نظریات و اصطلاحات، مسلح تنازعات کے قوانین، ابتدائی طبی امداد، جدید ڈرائیونگ، گولہ باری کے علوم، دھماکا خیز مواد، بارودی سرنگوں، ذاتی تحفظ اور پانی میں زندہ رہنے کی تکنیکوں سمیت مختلف موضوعات شامل ہیں۔اس کے علاوہ صحافیوں کو غلط معلومات سے نمٹنے، ذاتی سلامتی اور ایف پی وی ڈرونز سے تحفظ کے طریقوں سے بھی آگاہ کیا جائے گا۔