سعودی ہیلی کاپٹر حادثہ، ترکی کا اظہارِ افسوس

استنبول( ترکیہ خبر)ترکی نے مشرقی سعودی عرب میں ہیلی کاپٹر حادثے میں قیمتی جانوں کے ضیاع پر اتوار کے روز گہرے دکھ اور افسوس کا اظہار کیا ہے۔ترکی کی وزارت خارجہ کی جانب سے جاری بیان میں کہا گیا کہ ترکی، رأس تنورہ میں پیش آنے والے اس افسوسناک حادثے میں انسانی جانوں کے نقصان پر انتہائی رنجیدہ ہے۔بیان میں کہا گیا کہ اس المناک حادثے میں جاں بحق ہونے والوں کے لیے اللہ تعالیٰ سے مغفرت اور رحمت کی دعا کی جاتی ہے، جبکہ ان کے اہل خانہ اور سعودی عوام سے دلی تعزیت اور ہمدردی کا اظہار کیا جاتا ہے۔سعودی سرکاری خبر رساں ادارے کے مطابق سعودی تیل کمپنی آرامکو کے زیرِ انتظام ایک ہیلی کاپٹر رأس تنورہ میں گر کر تباہ ہو گیا، جس کے نتیجے میں اس میں سوار تمام 14 افراد جاں بحق ہوگئے۔سعودی وزارت توانائی کے ایک اہلکار کے حوالے سے بتایا گیا کہ حادثے میں جاں بحق ہونے والے تمام افراد سعودی شہری تھے۔رأس تنورہ سعودی عرب کے مشرقی ساحلی علاقے میں خلیج کے کنارے واقع ہے اور یہ مملکت کے اہم تیل صاف کرنے اور برآمدی مراکز میں شمار ہوتا ہے۔