بحیرۂ اسود میں شہری جہازوں پر حملے، ترکیہ کا اظہار تشویش
استنبول( ترکیہ خبر) ترکیہ نے بحیرۂ اسود میں شہری بحری جہازوں کو نشانہ بنائے جانے کے واقعات پر شدید تشویش کا اظہار کرتے ہوئے تمام فریقین سے بحری آمد و رفت کے تحفظ کے لیے فوری اقدامات کرنے کا مطالبہ کیا ہے۔ترک وزارت خارجہ کے مطابق روسی بندرگاہ نووروسیسک سے روانگی کے بعد ترکیہ کی ملکیت والے شہری بحری جہاز یاسر اور نادیزہدا کو پیر کی شام بغیر پائلٹ طیاروں کے ذریعے حملوں کا نشانہ بنایا گیا، جس کے نتیجے میں عملے کے متعدد افراد، جن میں ترک شہری بھی شامل ہیں، زخمی ہوگئے۔وزارت خارجہ نے اپنے بیان میں کہا کہ تمام انتباہات کے باوجود روس اور یوکرین کے درمیان جاری جنگ کا دائرہ بحیرۂ اسود تک پھیل رہا ہے، جس سے عام شہری جہاز بھی متاثر ہو رہے ہیں۔ترکیہ نے بحیرۂ اسود سے متعلق تمام فریقین پر زور دیا کہ وہ جہاز رانی کے تحفظ کو یقینی بنانے کے لیے عملی اقدامات کریں۔بیان میں خبردار کیا گیا کہ اگر کشیدگی روکنے کے لیے مؤثر اقدامات نہ کیے گئے تو بحیرۂ اسود کی صورتحال مزید بگڑ سکتی ہے، جس کے خوراک کے تحفظ سمیت کئی شعبوں پر منفی اثرات مرتب ہوں گے۔ترک وزارت خارجہ نے کہا کہ اپنے شہریوں کی سلامتی اور تحفظ حکومت کی اولین ترجیح ہے اور زخمی افراد کی صورتحال پر مسلسل نظر رکھی جا رہی ہے۔