ترکیہ نے یورپی یونین کی رپورٹ کو غیر منصفانہ قرار دے دیا

انقرہ( ترکیہ خبر) ترکیہ کے محکمہ اطلاعات کے سربراہ برہان الدین دوران اور وزارت خارجہ کے ترجمان اونجو کیجیلی نے یورپی یونین کے حالیہ جائزے کو تنقید کا نشانہ بناتے ہوئے اسے غیر متوازن، غیر منصفانہ اور اسٹریٹجک وژن سے عاری قرار دیا ہے۔ترکیہ کے محکمہ اطلاعات کے سربراہ برہان الدین دوران نے سماجی رابطے کی ویب سائٹ ایکس پر جاری بیان میں کہا کہ 15 جولائی 2026 کو جاری ہونے والی یورپی یونین کی "مشترکہ فہم" دستاویز میں شامل جائزے حقائق پر مبنی نہیں اور مستقبل کے لیے واضح حکمت عملی سے محروم ہیں۔انہوں نے کہا کہ ترکیہ کے امیدوار ملک ہونے کی حیثیت کو نظر انداز کرنے والا یورپی یونین کا رویہ مشترکہ مستقبل کے حوالے سے اس کے وژن کی کمی کو ظاہر کرتا ہے۔برہان الدین دوران نے کہا کہ دستاویز میں یورپی اور بحر اوقیانوس خطے کی سلامتی میں ترکیہ کے اہم کردار کو بھی نظر انداز کیا گیا ہے، حالانکہ نیٹو سربراہ اجلاس میں ترکیہ کی اہمیت کو واضح طور پر تسلیم کیا جا چکا ہے۔انہوں نے کہا کہ اس حقیقت کو نظر انداز کرنے والے بیانات تعمیری مذاکرات کو فروغ نہیں دیتے۔مشرقی بحیرہ روم اور قبرص کے معاملے پر بات کرتے ہوئے دوران نے کہا کہ یورپی یونین کی دستاویز میں یکطرفہ مؤقف دہرایا گیا ہے جو نہ بین الاقوامی قانون سے مطابقت رکھتا ہے اور نہ ہی تاریخی حقائق کی عکاسی کرتا ہے۔انہوں نے کہا کہ مستقل حل صرف منصفانہ، غیر جانب دار اور حقیقت پسندانہ طرزِ عمل کے ذریعے ہی ممکن ہے۔ترکیہ کے محکمہ اطلاعات کے سربراہ نے یورپی یونین پر زور دیا کہ وہ تعصب سے پاک، باہمی احترام اور مشترکہ مفادات پر مبنی زیادہ ذمہ دارانہ رویہ اختیار کرے تاکہ تعلقات میں مثبت پیش رفت ممکن ہو سکے۔