ترکی اور کرغزستان کا سفارتی و علاقائی تعاون بڑھانے پر اتفاق

انقرہ( ترکیہ خبر) ترکی کے وزیر خارجہ خاقان فیدان نے کہا ہے کہ ترکی اور کرغزستان اپنے اسٹریٹجک تعلقات کو مزید گہرا کرنے کے لیے پرعزم ہیں اور دونوں ممالک کئی علاقائی اور عالمی امور پر یکساں مؤقف رکھتے ہیں، جن میں تنازعات کو سفارت کاری کے ذریعے حل کرنے کی کوششیں بھی شامل ہیں۔انقرہ میں ترک-کرغز مشترکہ اسٹریٹجک پلاننگ گروپ کے ساتویں اجلاس کے بعد اپنے کرغز ہم منصب جینبیک کولوبایف کے ساتھ مشترکہ پریس کانفرنس میں گفتگو کرتے ہوئے انہوں نے کہا کہ دونوں برادر ممالک کے درمیان تعاون مسلسل مضبوط ہو رہا ہے۔خاقان فیدان نے کرغزستان کو 2027-2028 کے لیے اقوام متحدہ کی سلامتی کونسل کے غیر مستقل رکن منتخب ہونے پر مبارکباد دیتے ہوئے اسے ایک تاریخی کامیابی قرار دیا۔انہوں نے کہا کہ اجلاس میں اعلیٰ سطحی اسٹریٹجک تعاون کونسل کے حالیہ فیصلوں پر پیش رفت کا جائزہ لیا گیا اور دونوں ممالک کی وزارت خارجہ کے درمیان 2027-2028 کے لیے تعاون کا پروگرام بھی طے پایا۔ترک وزیر خارجہ کے مطابق دونوں ممالک کے تعلقات کو مزید منظم، منصوبہ بندی اور ادارہ جاتی بنیادوں پر آگے بڑھایا جانا چاہیے تاکہ باہمی تعاون زیادہ مؤثر اور پائیدار ہو سکے۔