امریکا ایران امن معاہدہ خطے میں استحکام کی جانب اہم قدم ہے: ترک وزیر خارجہ

استنبول( ترکیہ خبر) استنبول میں ترکیہ کے وزیر خارجہ حاکان فیدان نے امریکا اور ایران کے درمیان طے پانے والے امن معاہدے کا خیرمقدم کرتے ہوئے اسے خطے میں دیرپا امن اور استحکام کی جانب ایک اہم پیش رفت قرار دیا ہے۔سماجی رابطے کی ویب سائٹ پر جاری بیان میں انہوں نے کہا کہ ترکیہ اس معاہدے کو مثبت انداز میں دیکھتا ہے اور امید رکھتا ہے کہ آئندہ مذاکرات تعمیری انداز میں جاری رہیں گے۔حاکان فیدان نے کہا کہ امریکا اور ایران کے درمیان جنگ کے خاتمے کے لیے ہونے والا یہ معاہدہ خطے میں دیرپا امن اور استحکام کے قیام کی جانب ایک اہم سنگ میل ہے۔انہوں نے اس امید کا اظہار کیا کہ آئندہ ہونے والی “تکمیلی بات چیت” مثبت اور تعمیری ماحول میں آگے بڑھے گی۔ترک وزیر خارجہ نے معاہدے کے عمل میں کردار ادا کرنے والے ممالک کو سراہتے ہوئے کہا کہ پاکستان نے ثالثی میں اہم کردار ادا کیا، جبکہ قطر اور دیگر ممالک نے بھی اس عمل میں اہم معاونت فراہم کی۔انہوں نے زور دیا کہ ایسے عناصر کی کوششوں کو ناکام بنایا جائے جو اس معاہدے کو سبوتاژ کرنا چاہتے ہیں، اور تمام فریقین کو خطے کے امن و سلامتی کے تحفظ کے لیے ذمہ داری کا مظاہرہ کرنا چاہیے۔حاکان فیدان کے مطابق ترکیہ ابتدا سے ہی اس عمل کی حمایت اور سفارتی کوششوں میں کردار ادا کرتا رہا ہے اور خطے میں امن، استحکام اور کشیدگی میں کمی کے لیے اپنی کوششیں جاری رکھے گا۔واضح رہے کہ یہ معاہدہ پاکستانی وزیراعظم شہباز شریف کی جانب سے پیر کے روز اعلان کیا گیا تھا، جس کے تحت فریقین نے تمام محاذوں پر فوری اور مستقل جنگ بندی پر اتفاق کیا ہے۔ دستخطی تقریب جمعہ کو سوئٹزرلینڈ میں متوقع ہے۔