ترک وزیر خارجہ ہاکان فیدان کا برطانیہ کا دورہ، دو طرفہ تعلقات اور علاقائی امور پر اہم بات چیت متوقع

استنبول( ترکیہ خبر) ترکیہ کے وزیر خارجہ ہاکان فیدان آج جمعرات سے برطانیہ کا دو روزہ سرکاری دورہ کریں گے جس کے دوران وہ برطانوی وزیر خارجہ، ارکان پارلیمنٹ اور دیگر اعلیٰ حکام سے ملاقاتیں کریں گے۔سفارتی ذرائع کے مطابق اپنے دورے کے دوران ہاکان فیدان آکسفورڈ یونیورسٹی کے گلوبل ہسٹری سینٹر اور گلوبل آرڈر پروگرام کے زیر اہتمام ایک تقریب سے خطاب بھی کریں گے جبکہ برطانیہ میں مقیم ترک کمیونٹی اور کاروباری نمائندوں سے ملاقات کریں گے۔ذرائع کے مطابق ترک وزیر خارجہ برطانیہ اور ترکیہ کے درمیان تعلقات میں مثبت پیش رفت پر اطمینان کا اظہار کریں گے اور دو طرفہ تعاون کو مزید وسعت دینے اور تجارتی حجم بڑھانے پر زور دیں گے۔وہ موجودہ آزاد تجارتی معاہدے کی اپ گریڈیشن کی ضرورت پر بھی زور دیں گے تاکہ باہمی تجارت میں اضافہ کیا جا سکے۔ہاکان فیدان برطانیہ میں مقیم تقریباً پانچ لاکھ ترک شہریوں کے کردار کو دونوں ممالک کے درمیان انسانی، ثقافتی اور معاشی روابط کے لیے اہم قرار دیں گے۔مذاکرات میں ترک شہریوں کی مستقل رہائش سے متعلق درخواستوں میں تاخیر کے معاملے پر تشویش بھی ظاہر کیے جانے کا امکان ہے۔دونوں ممالک کے درمیان دفاعی صنعت، توانائی کے شعبے خصوصاً جوہری اور قابل تجدید توانائی میں تعاون بڑھانے پر بھی بات چیت متوقع ہے۔علاقائی امور بھی مذاکرات کا اہم حصہ ہوں گے جن میں ایران اور امریکا کے درمیان جاری مذاکرات، آبنائے ہرمز کی صورتحال اور روس یوکرین جنگ کے پرامن اور دیرپا حل کی کوششیں شامل ہیں۔