ترکیہ کی کاروباری برادری کا آئیوری کوسٹ میں بڑھتا ہوا سرمایہ کاری رجحان زرو پکڑ گیا

ابیجان( ترکیہ خبر) ترکیہ کے سفارتی حکام کے مطابق ترکیہ کی کاروباری برادری آئیوری کوسٹ میں تیزی سے اپنی موجودگی بڑھا رہی ہے، جس کی بڑی وجہ ملک میں سیاسی استحکام، محفوظ کاروباری ماحول اور مضبوط اقتصادی ترقی ہے۔ترکیہ کے سفیر نے بتایا کہ آئیوری کوسٹ مغربی افریقہ کی اہم معیشتوں میں شمار ہوتا ہے اور اب یہ ترک سرمایہ کاری کے لیے ایک اہم مرکز بنتا جا رہا ہے، جہاں تعمیرات، توانائی، زراعت، خوراک، ٹیکسٹائل، لاجسٹکس اور صنعت سمیت مختلف شعبوں میں تعاون بڑھ رہا ہے۔ان کے مطابق تقریباً ایک سو ترک کاروباری افراد اس وقت ملک میں سرگرم ہیں اور نئی سرمایہ کاری کے مواقع تلاش کر رہے ہیں، جبکہ دونوں ممالک کے درمیان دو طرفہ تجارت پہلے ہی ایک اعشاریہ پانچ ارب ڈالر سے تجاوز کر چکی ہے۔سفیر نے کہا کہ ترکیہ اور آئیوری کوسٹ کے تعلقات بہترین سطح پر ہیں اور دونوں ممالک کے درمیان مسلسل اعلیٰ سطحی روابط جاری ہیں، جبکہ افریقی خطے میں ترکیہ کے صدر کو بھی خاص مقبولیت حاصل ہے۔انہوں نے بتایا کہ دونوں ممالک کے درمیان سیاسی، زرعی، صحت، تجارت اور دفاع سمیت مختلف شعبوں میں تعاون بڑھ رہا ہے، اور متعدد معاہدوں کے ذریعے تعلقات کو مزید مضبوط کیا گیا ہے۔ان کے مطابق ترک سرمایہ کاری میں نمایاں اضافہ ہوا ہے، جس میں سیمنٹ، تعمیراتی مواد، کوکو پراسیسنگ اور کیمیکل انڈسٹری جیسے منصوبے شامل ہیں، جبکہ مزید سرمایہ کاری بھی متوقع ہے۔سفیر نے بتایا کہ اس سال مختلف شعبوں میں متعدد تجارتی سرگرمیاں منعقد کی جا رہی ہیں، جبکہ آئیوری کوسٹ نے دو ہزار چھبیس سے دو ہزار تیس کے لیے ترقیاتی منصوبہ بھی پیش کیا ہے، جس میں غیر ملکی سرمایہ کاروں کو خصوصی طور پر مدعو کیا گیا ہے۔انہوں نے مزید کہا کہ آئیوری کوسٹ اس وقت عالمی سرمایہ کاروں کے لیے ایک پرکشش مقام بن چکا ہے اور مختلف ممالک اس کی ترقیاتی صلاحیتوں میں گہری دلچسپی لے رہے ہیں۔