ترکیہ اور شام کے درمیان معاشی تعاون اور تجارت کی بحالی پر گازیانتیپ میں اہم سمٹ

استنبول( ترکیہ خبر)گازیانتیپ میں منعقد ہونے والی سٹی اکانومیز سمٹ میں ترکیہ اور شام کے درمیان معاشی تعاون، تجارت اور صنعتی روابط کی بحالی پر غور کیا جائے گا۔یہ کانفرنس انادولو ایجنسی اور گازیانتیپ میٹروپولیٹن میونسپلٹی کے اشتراک سے منعقد ہو رہی ہے، جس میں گازیانتیپ اور حلب کے درمیان معاشی تعلقات اور خطے میں اقتصادی انضمام کے امکانات کا جائزہ لیا جائے گا۔سمٹ 9 جون کو گازیانتیپ یونیورسٹی کے ماورا کانگریس اینڈ آرٹ سینٹر میں منعقد ہوگی، جس میں ترکیہ اور شام کے کاروباری نمائندے شریک ہوں گے۔تقریب میں ترکیہ کے وزیر تجارت اور شام کے وزیرِ معیشت و صنعت بھی خطاب کریں گے، جن میں دونوں ممالک کے درمیان تجارتی اور سرمایہ کاری کے مواقع پر بات چیت کی جائے گی۔منتظمین کے مطابق اس اجلاس کا مقصد خطے میں اقتصادی تعاون کو فروغ دینا اور تباہ حال معاشی ڈھانچے کی بحالی کے لیے مشترکہ حکمت عملی تیار کرنا ہے۔