ترکیہ کا یومیہ ایل این جی گیس فراہمی کی صلاحیت 200 ملین مکعب میٹر تک بڑھانے کا اعلان

 انقرہ ( ترکیہ خبر)ترکیہ کے صدر رجب طیب ایردوان نے کہا ہے کہ ملک خطے میں توانائی کی ترسیل کے ایک قابل اعتماد شراکت دار اور امن کے قیام میں اہم کردار ادا کرنے والا ملک بن چکا ہے۔استنبول میں منعقدہ نیشنل ریسورسز سمٹ سے خطاب کرتے ہوئے انہوں نے کہا کہ ترکیہ جغرافیائی طور پر ایک ایسا مرکزی پل ہے جو توانائی سے مالا مال خطوں اور توانائی کے محتاج ممالک کو جوڑتا ہے۔صدر ایردوان کے مطابق حالیہ علاقائی کشیدگی اور سپلائی کے خدشات کے دوران توانائی کی محفوظ فراہمی میں ترکیہ کی اہمیت مزید واضح ہوئی ہے۔انہوں نے بتایا کہ ترکیہ کے مائع قدرتی گیس کے ٹرمینلز، تیرتے ہوئے ذخیرہ اور ری گیسیفیکیشن یونٹس، ذخیرہ کرنے کے منصوبے اور پائپ لائن نیٹ ورک نے ملک کو یورپ کے مضبوط ترین توانائی مراکز میں شامل کر دیا ہے۔صدر ایردوان نے اعلان کیا کہ نئی سرمایہ کاری کے ذریعے ملک کی یومیہ ایل این جی گیس کو دوبارہ قابل استعمال بنانے کی صلاحیت موجودہ 161 ملین مکعب میٹر سے بڑھا کر 200 ملین مکعب میٹر تک لے جائی جائے گی۔انہوں نے کہا کہ ترکیہ کی توانائی پالیسی صرف سپلائی سکیورٹی تک محدود نہیں بلکہ یہ خطے میں استحکام اور امن کے فروغ سے بھی جڑی ہوئی ہے۔ترکیہ کی اسٹریٹجک جغرافیائی حیثیت اسے توانائی پیدا کرنے والے اور استعمال کرنے والے خطوں کے درمیان ایک اہم ٹرانزٹ روٹ بناتی ہے، خاص طور پر موجودہ عالمی توانائی بحران کے تناظر میں۔