ترکیہ اور شام کے درمیان صحت کے شعبے میں تعاون کا معاہدہ، طبی نظام مضبوط بنانے پر اتفاق

انقرہ( ترکیہ خبر)جمہوریہ ترکیہ اور شام نے صحت اور طبی علوم کے شعبے میں تعاون کے لیے ایک مفاہمتی یادداشت پر دستخط کیے ہیں۔ یہ اعلان ترکیہ کے وزیر صحت کمال میمیسوغلو نے جمعہ کے روز کیا۔وزیر صحت کے مطابق انہوں نے یہ معاہدہ اپنے شامی ہم منصب موسیٰ نزال العلی کے ساتھ شام کے ساتھ جاری سرکاری روابط کے دوران طے کیا۔یہ معاہدہ بنیادی طور پر صحت عامہ کے تحفظ، متعدی بیماریوں کے خلاف اقدامات، اور ماں اور بچے کی صحت کے نظام کو بہتر بنانے کے لیے تیار کیا گیا ہے۔کمال میمیسوغلو نے بتایا کہ اس تعاون میں ادویات، طبی آلات، ویکسین کی تیاری، طبی بایو ٹیکنالوجی، آفات اور ہنگامی حالات کے انتظام، صحت کے معلوماتی نظام اور صحت سیاحت کے فروغ جیسے شعبے بھی شامل ہیں، جن میں تکنیکی مہارت اور معلومات کے تبادلے پر زور دیا جائے گا۔انہوں نے کہا کہ یہ معاہدہ دونوں ممالک کے درمیان صحت کے شعبے میں تعاون کو مزید فروغ دے گا اور امید ہے کہ یہ اقدام دونوں اقوام کے لیے فائدہ مند ثابت ہوگا۔