ترکیہ نے 2025 میں غیر ملکی تجارت میں ایک تاریخی سنگِ میل عبور کیا ہے: ایردوان

استنبول( ترکیہ خبر) ترکیہ کے صدر رجب طیب ایردوان نے کہا ہے کہ ملک نے 2025 میں غیر ملکی تجارت میں ایک تاریخی سنگِ میل عبور کیا ہے، جہاں اشیاء اور خدمات کی برآمدات مجموعی طور پر 395.9 ارب ڈالر تک پہنچ گئی ہیں۔استنبول میں ترک ایکسپورٹرز اسمبلی سے خطاب کرتے ہوئے انہوں نے برآمدی کمپنیوں کو مبارکباد دی اور اس کامیابی کو محنت اور مستقل کوششوں کا نتیجہ قرار دیا۔صدر ایردوان کے مطابق 2025 میں عالمی چیلنجز کے باوجود ترکیہ کی معیشت 3.6 فیصد بڑھی، جبکہ 2026 کی پہلی سہ ماہی میں بھی 2.5 فیصد ترقی ریکارڈ کی گئی۔انہوں نے بتایا کہ ترکیہ نے مسلسل 23 سہ ماہیوں سے اپنی اقتصادی ترقی کا تسلسل برقرار رکھا ہے۔ان کے مطابق 2002 میں اشیاء کی برآمدات صرف 36 ارب ڈالر تھیں جو 2025 میں بڑھ کر 273.3 ارب ڈالر تک پہنچ گئیں، جبکہ خدمات کی برآمدات 14 ارب ڈالر سے بڑھ کر 122.6 ارب ڈالر ہو گئیں۔ترکیہ کا عالمی اشیاء برآمدات میں حصہ 0.55 فیصد سے بڑھ کر 1.04 فیصد اور خدمات میں حصہ 0.89 فیصد سے بڑھ کر 1.28 فیصد ہو گیا ہے۔صدر ایردوان نے کہا کہ ٹیکنالوجی کے شعبے میں بھی نمایاں ترقی ہوئی ہے، جہاں درمیانی اور بلند ٹیکنالوجی مصنوعات کی برآمدات 2002 کے 10 ارب ڈالر سے بڑھ کر 2025 میں 112 ارب ڈالر تک پہنچ گئی ہیں۔انہوں نے بتایا کہ دفاع اور ایوی ایشن کے شعبے میں بھی برآمدات میں 29.5 فیصد اضافہ ہوا ہے، جو سال کے پہلے پانچ ماہ میں 3.86 ارب ڈالر تک پہنچ گئی ہیں۔