انقرہ میں ترک دنیا کا تیسرا عالمی ثقافتی میلہ منعقد

انقرہ (کلچرڈیسک) ترکیہ کے دارالحکومت انقرہ میں ترک دنیا کے تیسرے بین الاقوامی کیچی اورین ترک دنیا میلے کا انعقاد کیا گیا، جس میں ترکیہ میں آذربائیجان کے سفارتخانے کے زیر انتظام آذربائیجانی ثقافتی مرکز نے اپنے ملک کی نمائندگی کی۔میلے کی میزبانی کیچی اورین بلدیہ نے کی، جبکہ ترک ثقافت کی بین الاقوامی تنظیم اور ترکیہ میں ترک ممالک کے سفارتخانوں و ثقافتی مراکز کے تعاون سے منعقد ہونے والی اس تقریب میں ترک دنیا کے مختلف ممالک کے سرکاری حکام، سفارتکار، ارکان پارلیمنٹ، ثقافتی شخصیات اور بڑی تعداد میں مقامی شہری شریک ہوئے۔افتتاحی تقریب سے ترک ریاستوں سے تعلقات کے ذمہ دار جسٹس اینڈ ڈویلپمنٹ پارٹی کے چیئرمین اور ترک پارلیمنٹ کے رکن کرشاد زورلو، کیچی اورین کے میئر مسعود اوز ارسلان اور دیگر اہم شخصیات نے خطاب کیا۔مقررین نے ترک دنیا کے مشترکہ تاریخی ورثے، اقدار اور مستقبل میں باہمی تعاون کے امکانات کو اجاگر کرتے ہوئے کہا کہ یہ میلہ ترک اقوام کے درمیان یکجہتی اور روابط مزید مضبوط بنانے میں اہم کردار ادا کرے گا۔