آزاد خارجہ پالیسی کے لیے مضبوط دفاعی صنعت ناگزیر ہے: جودت یلماز

استنبول( ترکیہ خبر) ترکیہ کے نائب صدر جودت یلماز نے کہا ہے کہ آزاد اور خودمختار خارجہ پالیسی کے لیے مضبوط مقامی دفاعی صنعت ناگزیر ہے، کیونکہ جو ممالک اپنی سلامتی کے لیے بیرونی طاقتوں پر انحصار کرتے ہیں وہ مکمل طور پر خودمختار فیصلے نہیں کر سکتے۔نجی ٹی وی چینل کو دیے گئے انٹرویو میں جودت یلماز نے کہا کہ اگر کوئی ملک آزاد خارجہ پالیسی اختیار کرنا چاہتا ہے تو اسے اپنی دفاعی صلاحیتوں کو مضبوط بنانا ہوگا۔ ان کے بقول بیرونی دفاعی وسائل پر انحصار کرنے والی ریاستیں اپنی خارجہ پالیسی میں مکمل آزادی برقرار نہیں رکھ سکتیں۔انہوں نے کہا کہ دنیا اس وقت ایک ایسے عبوری دور سے گزر رہی ہے جہاں عالمی طاقتوں کا توازن تبدیل ہو رہا ہے، بین الاقوامی ادارے کمزور پڑ رہے ہیں، تنازعات میں اضافہ ہو رہا ہے اور غیر یقینی صورتحال بڑھتی جا رہی ہے۔ترک نائب صدر نے کہا کہ ان عالمی تبدیلیوں کے اثرات نیٹو پر بھی مرتب ہوئے ہیں۔ انہوں نے ماضی میں نیٹو کے بارے میں کیے گئے "برین ڈیتھ" کے دعوؤں کا حوالہ دیتے ہوئے کہا کہ حالیہ نیٹو سربراہی اجلاس نے ثابت کیا ہے کہ اتحاد دوبارہ متحرک ہو رہا ہے۔جودت یلماز نے مزید کہا کہ یورپی ممالک دفاعی شعبے پر اپنی توجہ میں نمایاں اضافہ کر رہے ہیں۔ انہوں نے یورپی یونین کے 800 ارب یورو مالیت کے سیف (SAFE) پروگرام اور یورپی ممالک کے بڑھتے ہوئے دفاعی اخراجات کو اس رجحان کی واضح مثال قرار دیا۔