استنبول( ترکیہ خبر) ترکیہ میں دفاع، ہوا بازی اور خلائی ٹیکنالوجی سے متعلق نمائش ایس اے ایچ اے دو ہزار چھبیس کے انعقاد کی تیاریاں جاری ہیں، جس سے حاصل ہونے والی آمدن ملک بھر میں ڈرون پروڈکشن اور تربیتی مراکز کے قیام پر خرچ کی جائے گی۔ترک دفاعی کمپنی بائیکار کے چیف ایگزیکٹو ہالوک بائراکتار کے مطابق یہ نمائش پانچویں مرتبہ منعقد کی جا رہی ہے، جس میں سترہ سو سے زائد کمپنیاں شریک ہوں گی، جن میں سے دو سو ساٹھ غیر ملکی ہوں گی۔انہوں نے بتایا کہ اس سال ایونٹ میں دو لاکھ سے زائد افراد کی شرکت متوقع ہے، جبکہ پہلی نمائش کے مقابلے میں شرکاء کی تعداد میں نمایاں اضافہ ہوا ہے۔ان کے مطابق دفاعی اور صنعتی شعبے میں ترکیہ کا نیٹ ورک تیزی سے وسعت اختیار کر رہا ہے، اور ایس اے ایچ اے پلیٹ فارم سے سال دو ہزار چوبیس میں چھ اعشاریہ دو ارب ڈالر کے برآمدی معاہدے ہوئے۔حکام کے مطابق آئندہ برس اس ہدف کو بڑھا کر آٹھ ارب ڈالر تک لے جانے کا منصوبہ ہے۔بیان میں مزید کہا گیا کہ ترکیہ کے تمام اکیاسی صوبوں میں ڈرون پروڈکشن اور ٹریننگ سینٹرز قائم کیے جائیں گے، جن کا مقصد نوجوانوں کو جدید ٹیکنالوجی کی تربیت فراہم کرنا اور انہیں اس شعبے میں عملی مواقع دینا ہے۔حکام کے مطابق ان مراکز کو عوام کے لیے کھلا رکھا جائے گا تاکہ جدید دفاعی صنعت میں شمولیت کے مواقع مزید وسیع کیے جا سکیں۔
