پیرس اجلاس: ترکیہ کا عالمی آزاد تجارتی نظام کے فروغ پر زور

انقرہ( ترکیہ خبر)پیرس میں منعقدہ اقتصادی تعاون و ترقی تنظیم کے وزارتی کونسل اجلاس کے دوران ترکیہ کے وزیر تجارت عمر بولات نے عالمی سطح پر اصولوں پر مبنی کثیرالجہتی تجارتی نظام کے فروغ پر زور دیا ہے۔میڈیا رپورٹس کے مطابق دو روزہ یہ اجلاس فن لینڈ کی صدارت میں منعقد کیا جا رہا ہے، جس میں یورپ اور امریکا کو درپیش بڑھتے ہوئے تجارتی خسارے اور مشرقی ایشیا سے سبسڈی یافتہ برآمدات اور زائد پیداواری صلاحیت جیسے مسائل پر خصوصی توجہ دی جا رہی ہے۔اجلاس سے خطاب کرتے ہوئے ترک وزیر تجارت نے خبردار کیا کہ مغربی ممالک کی جانب سے بڑھتے ہوئے تحفظاتی تجارتی اقدامات عالمی معیشت کے لیے نقصان دہ ثابت ہو سکتے ہیں۔انہوں نے کہا کہ عالمی سطح پر تجارت کی آزادی، اور عالمی تجارتی تنظیم کے مرکز میں موجود اصولوں پر مبنی کثیرالجہتی نظام کی مضبوطی ہی معاشی ترقی، نمو اور عالمی تجارت میں بہتری کا واحد راستہ ہے۔ان کے مطابق ترکیہ نے گزشتہ دو دہائیوں میں برآمدات پر مبنی ترقی اور صنعتی پالیسیوں میں آزادی کے ذریعے نمایاں کامیابیاں حاصل کی ہیں۔انہوں نے مزید کہا کہ عالمی معیشت کے استحکام کے لیے آزاد تجارت کے فروغ اور تعاون پر مبنی اقدامات ناگزیر ہیں، جبکہ نئی پابندیاں اور تحفظاتی پالیسیاں مسائل کو مزید بڑھا سکتی ہیں۔وزیر تجارت نے یہ بھی بتایا کہ اجلاس کے دوران مختلف ممالک کے ساتھ دوطرفہ ملاقاتوں میں موجودہ معاشی مسائل اور ان کے حل کے لیے ممکنہ اقدامات پر تبادلہ خیال کیا گیا۔