آئندہ نیٹو انقرہ سمٹ میں 40 سے زائد ممالک شرکت کریں گے:سکیب آوداغچ

استنبول( ترکیہ خبر) استنبول چیمبر آف کامرس کے سربراہ سکیب آوداغچ نے کہا ہے کہ آئندہ نیٹو انقرہ سمٹ میں 40 سے زائد ممالک شرکت کریں گے، جن کی مجموعی اقتصادی پیداوار تقریباً 70 کھرب ڈالر ہے۔ یہ پیش رفت ترکی کے یورپ کی وسیع تر سکیورٹی اور معاشی ڈھانچے میں بڑھتے ہوئے مرکزی کردار کو ظاہر کرتی ہے۔انہوں نے انادولو ایجنسی سے گفتگو کرتے ہوئے کہا کہ یہ اہم سمٹ منگل اور بدھ کو منعقد ہو رہی ہے، جس میں عالمی رہنما ترکی میں اکٹھے ہوں گے۔سکیب آوداغچ کے مطابق ترکی کی عالمی حیثیت میں اضافہ گزشتہ دو دہائیوں میں مقامی دفاعی صنعت کی تیز رفتار ترقی کا نتیجہ ہے، جس کا مظاہرہ اس بڑے اجلاس کے اہم حصے نیٹو سمٹ ڈیفنس انڈسٹری فورم (NSDIF26) میں بھی کیا جائے گا، جو سمٹ کے پہلے دن شروع ہوگا۔انہوں نے کہا کہ نیٹو کا یہ اعلیٰ سطحی فورم ٹرانس اٹلانٹک دفاعی پیداوار، سرمایہ کاری اور جدت کے حوالے سے انتہائی اہمیت رکھتا ہے اور ترکی کے لیے بھی خاص طور پر اہم موقع ہے۔ان کے مطابق یہ فورم ترکی کی بڑھتی ہوئی دفاعی صنعت کو عالمی عسکری تعاون کے مرکز میں لاتا ہے۔ انہوں نے بتایا کہ نیٹو کے سیکریٹری جنرل مارک روٹے کے مطابق اتحاد کے اندر تقریباً 3 ہزار ترک دفاعی کمپنیاں فعال ہیں۔سکیب آوداغچ نے مزید کہا کہ 2010ء میں ترکی کی دفاعی صنعتوں کی ایجنسی (SSB) کے اشتراک سے قائم ہونے والا ٹیکنوپارک استنبول ملک کی جدید دفاعی اور ٹیکنالوجی پیداوار میں اہم کردار ادا کر رہا ہے۔