شمالی قبرص گیس معاہدے پر یونانی قبرص کی مخالفت مسترد

استنبول( تر کیہ خبر) شمالی قبرص کے ترک جمہوریہ کے وزیراعظم اونال اوسٹل نے ترکیہ کے ساتھ قدرتی گیس پائپ لائن کی تعمیر کے معاہدے کے خلاف اقوام متحدہ سے رجوع کرنے پر قبرصی یونانی انتظامیہ کو شدید تنقید کا نشانہ بنایا۔انہوں نے کہا کہ یونانی قبرصی انتظامیہ ترک قبرصی عوام کی ترقی، ترکیہ سے مضبوط تعلقات اور توانائی کے مستقبل کے لیے کیے جانے والے اقدامات کو نہیں روک سکتی۔ ان کا کہنا تھا کہ ترکیہ کے ساتھ مل کر عوام کے حقوق کا تحفظ، ملک کو مضبوط اور مستقبل کو محفوظ بنانے کا عمل جاری رکھا جائے گا۔اونال اوسٹل نے کہا کہ یونانی قبرصی انتظامیہ برسوں سے ترک قبرصی عوام کی رائے نظرانداز کرکے مختلف معاہدے کرتی رہی ہے، اس لیے شمالی قبرص اور ترکیہ کے باہمی معاہدے کی مخالفت اس کے اپنے طرزِ عمل سے متصادم ہے۔انہوں نے واضح کیا کہ شمالی قبرص کو اپنے مستقبل، ترقی اور توانائی کے تحفظ سے متعلق فیصلے کرنے کا حق حاصل ہے اور یونانی قبرصی انتظامیہ یہ طے نہیں کرسکتی کہ ترک قبرصی عوام ترکیہ کے ساتھ کن شعبوں میں تعاون کریں۔ان کے مطابق یونانی قبرصی انتظامیہ کی اصل تشویش شمالی قبرص اور ترکیہ کے بڑھتے ہوئے تعلقات ہیں، جبکہ وہ ترک قبرصی عوام کو وہی حقوق دینے سے گریزاں ہے جن کا خود اپنے لیے مطالبہ کرتی ہے۔