ہالینڈ اجلاس کے فیصلوں پر عمل درآمد اور دفاعی اخراجات پر توجہ ہوگی، مارک روٹے

استنبول( ترکیہ خبر) نیٹو کے سیکریٹری جنرل مارک روٹے نے کہا ہے کہ آئندہ انقرہ سمٹ میں گزشتہ سال ہالینڈ کے شہر دی ہیگ میں ہونے والے اجلاس کے فیصلوں پر عمل درآمد پر خصوصی توجہ دی جائے گی۔انہوں نے امریکی سوشل میڈیا پلیٹ فارم ایکس پر جاری ایک ویڈیو پیغام میں کہا کہ اس سمٹ کا مرکزی فوکس “عملی اقدامات” ہوں گے۔ ان کے مطابق دی ہیگ اجلاس میں متعدد اہم فیصلے کیے گئے تھے، اور اب ان پر مکمل عمل درآمد ضروری ہے۔مارک روٹے نے کہا کہ رہنما اجلاس میں دفاعی اخراجات کے قابلِ اعتماد منصوبوں پر غور کریں گے تاکہ تمام رکن ممالک اس ہدف کے مطابق پیش رفت کریں کہ وہ اپنی مجموعی دفاعی صلاحیت کو 5 فیصد تک لے جائیں۔انہوں نے مزید کہا کہ خوش آئند بات یہ ہے کہ دفاعی صنعت میں پیداوار میں اضافہ ہو رہا ہے، جبکہ یوکرین کے حوالے سے بھی اس بات کو یقینی بنایا جا رہا ہے کہ اسے اپنی دفاعی ضروریات کے مطابق بھرپور مدد حاصل ہو، تاکہ وہ جنگ میں مضبوط پوزیشن برقرار رکھ سکے اور مستقبل میں امن مذاکرات کے لیے بہتر صورتحال میں ہو۔نیٹو سیکریٹری جنرل کے مطابق انقرہ اجلاس اتحاد کے فیصلوں پر عمل درآمد، دفاعی تعاون اور عالمی سکیورٹی چیلنجز کے تناظر میں انتہائی اہمیت کا حامل ہوگا۔