ترکیہ امریکا تعلقات میں نیٹو اہم ستون ہے، عاکف چاغاتائے کلچ

انقرہ( تر کیہ خبر) ترک صدر رجب طیب اردوان کے چیف خارجہ پالیسی و سلامتی مشیر عاکف چاغاتائے کلچ نے کہا ہے کہ ترکیہ اور امریکا کے تعلقات صرف فوجی تعاون تک محدود نہیں، تاہم نیٹو اس شراکت داری کا اہم ستون ہے۔اقوام متحدہ کی جنرل اسمبلی کے ہفتے کے دوران نیویارک میں ترکیہ کے محکمہ اطلاعات کے زیر اہتمام ’’ترکیہ امریکا تعلقات، صد سالہ دور کی دہلیز پر‘‘ کے عنوان سے منعقدہ مذاکرے میں گفتگو کرتے ہوئے عاکف چاغاتائے کلچ نے کہا کہ امریکا کے ساتھ ترکیہ کے تعلقات دنیا کے دیگر ممالک کے ساتھ تعلقات سے نمایاں طور پر مختلف ہیں۔مذاکرے میں صدارتی کونسل برائے سلامتی و خارجہ پالیسی کے نائب سربراہ چاغری ایرحان، ترکیہ میں امریکا کے سابق سفیر اور ریٹائرڈ سفارت کار جیمز جیفری اور آذربائیجان میں امریکا کے سابق سفیر میتھیو برائزا بھی شریک تھے۔کلچ نے کہا کہ دونوں ممالک کے باہمی تعلقات صرف فوجی روابط پر مبنی نہیں، تاہم نیٹو ان تعلقات کا ایک اہم حصہ ہے۔انہوں نے مزید کہا کہ 1950 اور 1960 کی دہائیوں میں ترکیہ جس خطے اور جغرافیائی ماحول میں موجود تھا، وقت کے ساتھ اس میں نمایاں تبدیلیاں آئیں، جس کے نتیجے میں آج خطے کی صورت حال ماضی سے بہت مختلف ہے۔