نخچیوان میں عوامی ٹرانسپورٹ مکمل طور پر الیکٹرک بسوں پر منتقل

باکو( تر کیہ خبر) آذربائیجان کے خودمختار علاقے نخچیوان شہر میں عوامی ٹرانسپورٹ کا نظام مکمل طور پر الیکٹرک بسوں پر منتقل کردیا گیا ہے۔نخچیوان میں آذربائیجان کے صدر کے بااختیار نمائندے جیحون جلیل اوف نے بتایا کہ خطے کے عوامی ٹرانسپورٹ نظام میں جدید انتظامی نظام بھی متعارف کرایا گیا ہے۔انہوں نے کہا کہ شہری اب ’’سمارٹ‘‘ نظام سے لیس ٹرانسپورٹ سروس استعمال کر رہے ہیں، جہاں کرایوں کی ادائیگی مکمل طور پر غیر نقد طریقے سے کی جاتی ہے، جبکہ بسوں کے درمیان وقفے اور مسافروں کے رش کو بھی سمارٹ نظام کے ذریعے منظم کیا جاتا ہے۔جیحون جلیل اوف کے مطابق اس اقدام کا مقصد شہریوں کو بہتر سفری سہولت فراہم کرکے ان کے اطمینان کو یقینی بنانا ہے۔انہوں نے بتایا کہ اگلے مرحلے میں صدر کے حکم کے مطابق عوامی ٹرانسپورٹ کی تجدید کا دائرہ نخچیوان کے تمام آبادی والے علاقوں کے درمیان قائم راستوں کے نیٹ ورک تک بڑھایا جائے گا۔