موغادیشو( ترکیہ خبر) موغادیشو میں ترک تعاون و رابطہ ایجنسی (TİKA) کی جانب سے صومالیہ کو جدید آلات فراہم کیے گئے ہیں تاکہ ملک کی وزارتِ زراعت و آبپاشی کے انتظامی امور کو بہتر اور جدید بنایا جا سکے۔صومالیہ کے وزیرِ زراعت و آبپاشی محمد عبدی حایر مریے نے ایک بیان میں کہا کہ ترکی کی اس معاونت سے ادارہ جاتی کارکردگی بہتر ہوگی، خدمات کی فراہمی تیز ہوگی اور ملک کو غذائی خود کفالت کے حصول میں مدد ملے گی۔وزیر نے موغادیشو میں منعقدہ تقریب کے بعد ترکی کی اس ترقیاتی ایجنسی کا شکریہ ادا کرتے ہوئے کہا کہ یہ تعاون برادر ملک ترکیہ کی جانب سے ایک مثبت اور اہم اقدام ہے۔انہوں نے بتایا کہ یہ درخواست 2025 میں انقرہ میں ہونے والی ملاقات کے دوران پیش کی گئی تھی۔فراہم کیے گئے آلات میں کمپیوٹرز، پرنٹرز اور ٹیلی ویژن اسکرینیں شامل ہیں۔وزیر کے مطابق صومالیہ اور ترکیہ کے درمیان قریبی دوستانہ تعلقات 2011 سے قائم ہیں، جب اس وقت کے ترک وزیراعظم اور موجودہ صدر رجب طیب ایردوان نے صومالیہ کا دورہ کیا تھا۔اس کے بعد ترکیہ کی جانب سے صومالیہ کو انسانی اور ترقیاتی شعبوں میں ایک ارب ڈالر سے زائد کی امداد فراہم کی جا چکی ہے، جس میں صحت، تعلیم، بلدیاتی خدمات اور بنیادی ڈھانچے کے منصوبے شامل ہیں۔
