مائیکل جیکسن پر بننے والی فلم نے نیا عالمی ریکارڈ قائم کر دیا

انقرہ(کلچر ڈیسک) عالمی شہرت یافتہ پاپ گلوکار مائیکل جیکسن کی زندگی پر مبنی فلم "مائیکل" دنیا کی سب سے زیادہ کمائی کرنے والی سوانحی فلم بن گئی ہے۔فلم نے عالمی باکس آفس پر 977 ملین ڈالر سے زائد کا کاروبار کرکے ہدایت کار کرسٹوفر نولان کی فلم "اوپن ہائیمر" کا ریکارڈ توڑ دیا، جس نے 2023 میں دنیا بھر سے تقریباً 976 ملین ڈالر کمائے تھے۔ہدایت کار انٹوان فوکوا کی بنائی گئی اس فلم نے اس سے قبل 2018 کی معروف سوانحی فلم "بوہیمین ریپسوڈی" کا ریکارڈ بھی توڑا تھا، جو برطانوی بینڈ کوئین کے مرکزی گلوکار فریڈی مرکری کی زندگی پر مبنی تھی، اور یوں یہ تاریخ کی سب سے زیادہ کمائی کرنے والی میوزیکل سوانحی فلم بھی بن گئی۔اپریل میں ریلیز ہونے والی "مائیکل" نے نمائش کے پہلے ہی ہفتے میں دنیا بھر سے 217 ملین ڈالر کا شاندار کاروبار کیا اور رواں سال کی کامیاب ترین فلموں میں شامل ہو گئی۔فلم میں مائیکل جیکسن کی جیکسن فائیو گروپ کے ساتھ ابتدائی موسیقی کے سفر سے لے کر "کنگ آف پاپ" بننے تک کی داستان پیش کی گئی ہے۔ مرکزی کردار مائیکل جیکسن کے بھتیجے جعفر جیکسن نے ادا کیا ہے، جبکہ کولمین ڈومینگو اور نیا لانگ نے ان کے والدین کے کردار نبھائے ہیں۔اس کے علاوہ "مائیکل" فلمی کمپنی لائنز گیٹ کی تاریخ کی بھی سب سے زیادہ کمائی کرنے والی فلم بن گئی ہے، جس نے "دی ہنگر گیمز: کیچنگ فائر" کا ریکارڈ بھی پیچھے چھوڑ دیا۔