حاقان فیدان کا لیبیا کا سرکاری دورہ، طرابلس و بن غازی میں ملاقاتیں متوقع
استنبول/انقرہ( تر کیہ خبر) ترکیہ کے وزیر خارجہ حاقان فیدان منگل اور بدھ کو لیبیا کا سرکاری دورہ کریں گے۔ترک وزارت خارجہ کے ذرائع کے مطابق حاقان فیدان دورے کے دوران طرابلس اور بن غازی جائیں گے جہاں لیبیا کی قیادت اور حکام سے اہم ملاقاتیں کریں گے۔مذاکرات میں تاریخی برادرانہ تعلقات اور باہمی مفادات کی بنیاد پر ترکیہ اور لیبیا کے روابط کو مزید مضبوط بنانے کے امور زیر بحث آئیں گے، بالخصوص سیاسی، تجارتی، توانائی، عسکری اور دفاعی شعبوں میں تعاون پر توجہ دی جائے گی۔ترک وزیر خارجہ لیبیا کے سیاسی عمل میں ہونے والی تازہ پیش رفت پر بھی تبادلہ خیال کریں گے اور ملک کے استحکام کے لیے ترکیہ کی اہمیت کو اجاگر کریں گے۔ وہ امریکی اقدامات اور اقوام متحدہ کی زیر قیادت سیاسی عمل سے متعلق انقرہ کے مؤقف سے بھی آگاہ کریں گے۔حاقان فیدان لیبیا میں پائیدار امن اور پرسکون ماحول کے قیام کے لیے مقامی قیادت کی نگرانی میں ہونے والے اقدامات میں ترکیہ کے ممکنہ کردار پر بھی مشاورت کریں گے۔ترکیہ کی ’’ایک لیبیا‘‘ پالیسی کے تحت ملک کے مغربی، مشرقی اور جنوبی حصوں میں کوئی تفریق نہ کرنے کے مؤقف کو دہراتے ہوئے حاقان فیدان لیبیا کے تمام علاقوں کے حکام کے ساتھ رابطے مزید مضبوط بنانے کے عزم کا اظہار کریں گے۔