نیٹو سربراہی اجلاس امن، استحکام اور سلامتی کے فروغ کا ذریعہ ثابت ہوگا:حاقان فیدان

استنبول( ترکیہ خبر) ترک وزیر خارجہ حاقان فیدان نے کہا ہے کہ 7 اور 8 جولائی کو انقرہ میں منعقد ہونے والا نیٹو کا سربراہی اجلاس کامیابی کے ساتھ اختتام پذیر ہوا، جبکہ تمام اتحادی رہنماؤں کی شرکت ترکیہ اور صدر رجب طیب اردوان پر اعتماد کا واضح اظہار ہے۔ترک سوشل میڈیا پلیٹ فارم پر جاری اپنے بیان میں حاقان فیدان نے کہا کہ یہ تاریخی اجلاس ایسے وقت میں منعقد ہوا جب نیٹو کی مستقبل کی حکمت عملی اور تنظیمی تبدیلی پر اہم عالمی مباحث جاری تھے۔انہوں نے کہا کہ اجلاس میں یورو۔اٹلانٹک خطے کی سلامتی سے متعلق اہم امور پر تفصیلی غور کیا گیا اور نیٹو 3.0 وژن کے تحت ’’زیادہ مضبوط نیٹو میں ایک مضبوط یورپ‘‘ کی بنیاد رکھی گئی۔وزیر خارجہ نے صدر رجب طیب اردوان کا شکریہ ادا کرتے ہوئے کہا کہ ان کی دور اندیش قیادت اور مؤثر حکمت عملی کی بدولت ترکیہ 22 برس بعد ایک مرتبہ پھر نیٹو سربراہی اجلاس کی میزبانی کرنے میں کامیاب ہوا۔حاقان فیدان نے نیٹو کے سیکرٹری جنرل مارک روٹے اور رکن ممالک کے وزرائے خارجہ کا بھی اجلاس کی تیاریوں کے دوران قریبی تعاون پر شکریہ ادا کیا۔انہوں نے امید ظاہر کی کہ انقرہ میں ہونے والا نیٹو سربراہی اجلاس ترکیہ سمیت تمام اتحادی ممالک کے لیے امن، استحکام اور سلامتی کے فروغ کا ذریعہ ثابت ہوگا۔