ماحولیاتی تبدیلی انسانیت کے لیے جنگ اور وباؤں جیسا خطرہ ہے:صدر ایردوان کا انتباہ

استنبول ( ترکیہ خبر) زیرو ویسٹ فورم کی گالا ڈنر تقریب سے خطاب کرتے ہوئے ترکیہ کے صدر رجب طیب ایردوان نے کہا ہے کہ ماحولیاتی تبدیلی انسانیت کے لیے ایک سنگین خطرہ ہے، جس کے اثرات جنگوں اور عالمی وباؤں جیسے ہیں۔انہوں نے کہا کہ ماحولیاتی اور پیداواری مسائل ایک دوسرے سے جڑے ہوئے ہیں، جن میں فضائی آلودگی، خوراک کی کمی، فضلہ کا انتظام اور قدرتی آفات شامل ہیں، اور یہ سب ایک “تتلی اثر” کے تحت ایک دوسرے کو متاثر کرتے ہیں۔صدر ایردوان کے مطابق ان مسائل کے اثرات ہر سال مزید شدت اختیار کر رہے ہیں اور توانائی، ٹرانسپورٹ، صحت، زراعت اور لائیو اسٹاک سمیت مختلف شعبے اس سے متاثر ہو رہے ہیں۔انہوں نے زور دیا کہ اس مسئلے کو صرف “ماحولیاتی تبدیلی” کے بجائے “ماحولیاتی بحران” کے طور پر دیکھا جانا چاہیے تاکہ اس کے حل کے لیے زیادہ مؤثر اور حقیقت پسندانہ پالیسیاں بنائی جا سکیں۔ایردوان نے کہا کہ موجودہ دور میں مصنوعی ذہانت اور جدید ٹیکنالوجی پیداوار کو تیز کر رہی ہے، جبکہ غیر ذمہ دارانہ اور غیر شعوری کھپت قدرتی وسائل کو نقصان پہنچا رہی ہے۔