ماحولیات، جنگلات، حیاتیاتی تنوع، سمندر، دریا اور ہوا سب مشترکہ انسانی اثاثہ ہیں: الہام علییف کا پیغام

باکو( ترکیہ خبر) آذربائیجان نے اقوام متحدہ کے ماحولیاتی پروگرام کے ساتھ شراکت داری کے تحت دارالحکومت باکو میں عالمی یوم ماحولیات کی میزبانی کی ہے۔آذربائیجان کی سرکاری خبر رساں ایجنسی کے مطابق یہ تقریب "فطرت سے تحریک، آب و ہوا کے لیے، ہمارے مستقبل کے لیے" کے عنوان کے تحت منعقد کی گئی۔تقریب میں آذربائیجان کے صدر کے ماحولیاتی امور کے نمائندے مختار بابایوف نے صدر الہام علییف کا پیغام شرکاء کو پڑھ کر سنایا۔ماحولیات اور قدرتی وسائل کے وزیر رشاد اسماعیلوف نے خطاب کرتے ہوئے کہا کہ ماحولیات، جنگلات، حیاتیاتی تنوع، سمندر، دریا اور ہوا سب مشترکہ انسانی اثاثہ ہیں، جن کے تحفظ کے لیے اقتصادی ترقی، سماجی بہبود اور ماحولیاتی توازن کو ساتھ لے کر چلنا ضروری ہے۔انہوں نے کہا کہ آذربائیجان پائیدار ترقی اور قابلِ تجدید توانائی کے فروغ کو اپنی ترجیح قرار دیتا ہے اور 2030 تک توانائی کے مجموعی نظام میں قابلِ تجدید ذرائع کا حصہ 30 فیصد تک بڑھانے کا ہدف رکھتا ہے۔ان کے مطابق یہ اہداف پیرس معاہدے کے تحت 2035 تک گرین ہاؤس گیسوں کے اخراج میں کمی کے لیے بنیاد فراہم کریں گے۔وزیر نے مزید کہا کہ ماضی میں آرمینیا کے زیرِ قبضہ علاقوں میں قدرتی وسائل اور ماحولیاتی نظام کو شدید نقصان پہنچا ہے، تاہم اب ان علاقوں میں بڑے پیمانے پر بحالی اور تعمیر نو کا عمل جاری ہے جو ماحولیاتی اصولوں کے مطابق انجام دیا جا رہا ہے۔انہوں نے کہا کہ اقوام متحدہ کے ماحولیاتی پروگرام سے ماحولیاتی بحالی کے لیے تکنیکی مدد حاصل کی گئی ہے، جس پر حکومت نے ادارے کا شکریہ ادا کیا ہے۔اقوام متحدہ کے ماحولیاتی پروگرام کی ایگزیکٹو ڈائریکٹر انگر اینڈرسن نے کہا کہ آذربائیجان عالمی، علاقائی اور قومی سطح پر ماحولیاتی اقدامات میں اہم کردار ادا کر رہا ہے اور خصوصاً COP29 کی میزبانی کے ذریعے اس نے موسمیاتی قیادت کا مظاہرہ کیا ہے۔