آذربائیجان اور امریکہ کا توانائی تعاون ملکی ترقی کا سبب بنے گا

واشنگٹن( ترکیہ خبر)— آذربائیجان کی سرکاری خبر رساں ایجنسی کے مطابق آذربائیجان کی ریاستی تیل کمپنی کے صدر روشَن نجف نے کہا ہے کہ آذربائیجان اور امریکہ کے درمیان توانائی کے شعبے میں تین دہائیوں سے جاری کامیاب تعاون نے ملک کے توانائی کے شعبے کی ترقی میں نمایاں کردار ادا کیا ہے۔انہوں نے یہ بات واشنگٹن میں امریکہ آذربائیجان چیمبر آف کامرس کی تیسویں سالگرہ کے موقع پر منعقدہ بین الاقوامی کانفرنس کے دوران مرکزی اجلاس سے خطاب کرتے ہوئے کہی۔ اجلاس کا عنوان تھا دوطرفہ تجارت اور تزویراتی تعاون کو مضبوط بنانا۔ اس کانفرنس میں امریکہ اور آذربائیجان کے درمیان تجارت اور کاروباری ایجنڈے پر بھی گفتگو کی گئی۔روشَن نجف نے اپنے خطاب میں زور دیا کہ امریکی کمپنیاں آذربائیجان کے بڑے تیل اور گیس منصوبوں میں شامل ہونے والے ابتدائی شراکت داروں میں شامل تھیں۔ انہوں نے کہا کہ اس مضبوط تعاون کی بنیاد صدی کے معاہدے پر دستخط سے رکھی گئی تھی۔