قبرص کے قریب مسافر جہاز حادثہ، 23 لاپتا افراد کی تلاش جاری

قبرص( تر کیہ خبر)ترکیہ نے شمالی قبرص کے ساحل کے قریب مسافر جہاز الٹنے کے بعد لاپتا ہونے والے 23 افراد کی تلاش اور امدادی کارروائیوں کے لیے مزید فضائی اور بحری وسائل فراہم کیے ہیں۔ شمالی قبرص کے صدر توفان ایرحورمان نے اتوار کو یہ اطلاع دی۔ایرحورمان نے اناطولیہ خبر ایجنسی کو بتایا کہ حادثے کے فوراً بعد ترک قبرصی ساحلی محافظ دستے کے چار بحری جہاز اور سکیورٹی فورسز کمانڈ کے دو ہیلی کاپٹر امدادی کارروائیوں میں مصروف ہوگئے۔انہوں نے بتایا کہ 30 اگست یومِ فتح کی تقریبات کے لیے شمالی قبرص میں موجود ترکیہ کی بحریہ کے دو جہاز بھی تلاش اور امدادی سرگرمیوں میں شامل ہوگئے۔ایرحورمان کے مطابق امدادی ٹیموں نے اس مسافر جہاز سے 237 افراد کو بحفاظت نکال لیا، جو جنوبی ترکیہ کے شہر مرسین کے ضلع تاشوجو کی جانب سفر کرتے ہوئے الٹ گیا تھا۔ حادثے میں سات افراد کی لاشیں بھی برآمد کی جاچکی ہیں۔انہوں نے کہا کہ لاپتا 23 افراد کی تلاش بدستور جاری ہے اور ترکیہ سے آنے والے ترک مسلح افواج کے دو بغیر پائلٹ طیارے اور ایک ’’کاسا‘‘ طرز کا طیارہ بھی کارروائی میں حصہ لے رہے ہیں۔ان کے مطابق ترک فضائیہ کا ایک ہیلی کاپٹر، ساحلی محافظ کمانڈ کے دو ہیلی کاپٹر اور ترکیہ سے بھیجے گئے ساحلی محافظ دستے کے دو بحری جہاز بھی تلاش اور امدادی آپریشن میں شریک ہیں۔