کینیڈا اور ترکیہ کا نیٹو سمٹ میں دفاعی تعاون بڑھانے پر اتفاق

 استنبول( ترکیہ خبر) کینیڈا کی وزیر خارجہ انیتا آنند نے کہا ہے کہ انقرہ میں ہونے والا نیٹو سربراہی اجلاس انتہائی اہمیت کا حامل اور بے حد متوقع ہے۔انہوں نے اوٹاوا میں اپنے ترک ہم منصب ہاکان فیدان کے ساتھ مشترکہ پریس کانفرنس میں کہا کہ 7 اور 8 جولائی کو ہونے والا یہ اجلاس خاص طور پر دفاعی صنعت پر توجہ مرکوز کرے گا، جہاں نیٹو اتحادیوں کے درمیان تعاون کو مزید مضبوط بنایا جائے گا۔انیتا آنند کے مطابق اس اجلاس میں سپلائی چینز کے انضمام، باہمی ہم آہنگی (انٹروپریبیلٹی) اور اس سے پیدا ہونے والے معاشی فوائد پر خاص توجہ دی جائے گی۔انہوں نے کہا کہ کینیڈا اور ترکیہ نہ صرف دوطرفہ تعلقات بلکہ دفاع اور سیکیورٹی کے شعبوں میں بھی تعاون کو مزید وسعت دیں گے۔کینیڈین وزیر خارجہ نے نیٹو کے مجوزہ ڈیفنس سیکیورٹی اینڈ ریزیلینس بینک کو اس تعاون کی ایک مثال قرار دیا اور کہا کہ کینیڈا اس سمٹ میں شرکت کا شدت سے منتظر ہے۔