آذربائیجان کے سفیر ایلچن حسینوف نے روم میں ایف اے او کے سربراہ کو اسناد پیش کردیں

باکو( تر کیہ خبر) اٹلی میں آذربائیجان کے سفیر ایلچن حسینوف نے اقوام متحدہ کے ادارہ برائے خوراک و زراعت (ایف اے او) میں اپنے ملک کے مستقل نمائندے کی ذمہ داریاں سنبھالتے ہوئے ادارے کے سربراہ کو اسناد پیش کردیں۔12 نومبر کو روم میں واقع ایف اے او کے مرکزی دفتر میں منعقدہ تقریب کے دوران سفیر نے ڈائریکٹر جنرل کو ڈونگ یو کو اپنی اسناد پیش کیں۔اس موقع پر ہونے والی ملاقات میں آذربائیجان اور ایف اے او کے درمیان 1995 سے جاری تعاون کی موجودہ صورتحال پر تبادلہ خیال کیا گیا۔ آذربائیجان کی جانب سے ادارے کے کام اور دیہی ترقی کے شعبے میں دوسرے ممالک کے ساتھ دوطرفہ تعاون میں کردار کو بھی اجاگر کیا گیا۔ملاقات میں اس بات پر زور دیا گیا کہ مستقبل میں ایف اے او کے ساتھ مشترکہ منصوبوں کو زراعت اور غذائی تحفظ سے متعلق آذربائیجان کی ترجیحات کے مطابق ترتیب دیا جائے۔اس موقع پر 2024 میں آذربائیجان میں منعقد ہونے والی عالمی ماحولیاتی کانفرنس کوپ 29 کے دوران ایف اے او کے سربراہ کے دورے کا بھی ذکر کیا گیا۔ مزید بتایا گیا کہ آذربائیجان کی صدارت اور ایف اے او کے اشتراک سے کسانوں کے لیے موسمیاتی اقدام ’’باکو ہارمنی‘‘ پر عمل درآمد شروع ہو چکا ہے۔