عرب دنیا میں ’’اسپائیڈر مین‘‘ کے بائیکاٹ کی اپیل
انقرہ( کلچر ل ڈیسک) لبنان، اردن اور عرب دنیا کے دیگر علاقوں میں فلسطین کے حامی کارکنوں نے فلم ’’اسپائیڈر مین: برانڈ نیو ڈے‘‘ کے بائیکاٹ کی اپیل کردی۔مہم چلانے والوں نے فلم کے پروڈیوسر ایوی اراد کی اسرائیل کی حمایت اور غزہ جنگ کے دوران اسرائیلی وزیراعظم بنیامین نیتن یاہو پر ہونے والی تنقید کو مسترد کرنے کے مؤقف پر اعتراض کیا ہے۔لبنان میں اسرائیل کے حامیوں کے بائیکاٹ کی مہم چلانے والے گروپ نے عوام سے فلم کے ٹکٹ نہ خریدنے کی اپیل کرتے ہوئے مؤقف اختیار کیا کہ ایسے افراد سے وابستہ فلم کو مالی معاونت فراہم کرنا جنہوں نے کھلے عام اسرائیل کی حمایت کی، ’’ثقافتی معمول پر لانے‘‘ کے مترادف ہے۔گروپ نے فلم کی ریلیز سے قبل سوشل میڈیا پر جاری بیان میں سوال اٹھایا کہ کیا عوام ایسی پروڈکشن کی حمایت کرنا چاہتے ہیں جس سے وابستہ افراد نے اسرائیل کی کھلے عام سیاسی حمایت کی ہو؟مہم کے تحت عوام سے فلم کی معاوضے والی نمائشوں سے بھی گریز کرنے کی اپیل کی گئی ہے۔ گروپ کا کہنا ہے کہ اس کا مؤقف اسرائیل یا اس کی پالیسیوں کو معمول کے طور پر قبول کرنے کی مخالفت پر مبنی ہے۔