مسجد اقصیٰ کے تقدس کو نشانہ بنانے والی کسی بھی کوشش کو برداشت نہیں کیا جا سکتا:برہان الدین دوران

استنبول( تر کیہ خبر) ترکیہ کے شعبہ اطلاعات کے سربراہ برہان الدین دوران نے مقبوضہ مشرقی یروشلم میں اسرائیلی قومی سلامتی کے وزیر کی قیادت میں مسجد اقصیٰ پر کیے گئے دھاوے کی سخت الفاظ میں مذمت کی ہے۔برہان الدین دوران نے سماجی رابطے کی ویب سائٹ پر اپنے بیان میں کہا کہ اسرائیلی کابینہ کے ایک وزیر کی جانب سے انتہا پسند گروہ کے ہمراہ مسجد اقصیٰ پر کیا گیا اشتعال انگیز حملہ ناقابل قبول ہے۔ انہوں نے کہا کہ مسجد اقصیٰ کے تقدس کو نشانہ بنانے والی کسی بھی کوشش کو برداشت نہیں کیا جا سکتا۔انہوں نے خبردار کیا کہ اسرائیلی حکومت کی جانب سے یروشلم کی تاریخی اور قانونی حیثیت کو متاثر کرنے کے لیے کیے جانے والے یکطرفہ اقدامات خطے میں کشیدگی کو مزید بڑھا رہے ہیں اور پائیدار امن کی امیدوں کو نقصان پہنچا رہے ہیں۔ترکیہ کے صدر رجب طیب اردوان کے مسجد اقصیٰ اور یروشلم کی تاریخی حیثیت کے تحفظ سے متعلق مؤقف کا حوالہ دیتے ہوئے دوران نے کہا کہ ان مقدس مقامات کا تحفظ صرف خطے کی نہیں بلکہ عالمی برادری کی بھی مشترکہ ذمہ داری ہے۔انہوں نے کہا کہ انقرہ فلسطینی عوام کے جائز حقوق اور عالمی قانون کے تحت یروشلم کے حقوق کے دفاع کا سلسلہ جاری رکھے گا۔یروشلم گورنریٹ کے مطابق جمعرات کو اسرائیل کے انتہا پسند قومی سلامتی کے وزیر اتمار بن گویر کے ہمراہ تقریباً 1300 اسرائیلی آباد کاروں نے مقبوضہ مشرقی یروشلم میں مسجد اقصیٰ کے احاطے پر دھاوا بولا۔ یہ کارروائی یہودی تہوار تیشا باؤ کے موقع پر کی گئی، جس میں وہ اپنے دعوے کے مطابق "معبد کی تباہی" کی یاد مناتے ہیں۔