اسرائیلی حراست سے رہا ہونے والے عالمی امدادی قافلے کے کارکن استنبول پہنچ گئے

استنبول( ترکیہ خبر) عالمی انسانی امدادی قافلے “گلوبل سمود” سے تعلق رکھنے والے کارکنوں کو اسرائیلی حراست سے رہائی کے بعد تین پروازوں کے ذریعے استنبول پہنچا دیا گیا۔یہ کارکن اس وقت حراست میں لیے گئے تھے جب وہ غزہ کی ناکہ بندی توڑ کر امدادی سامان پہنچانے کی کوشش کر رہے تھے اور ان کی کشتیوں کو مبینہ طور پر بین الاقوامی پانیوں میں روکا گیا تھا۔ترک ایئرلائنز کی تین پروازیں ان کارکنوں کو لے کر استنبول ایئرپورٹ پہنچیں، جہاں انہیں وی آئی پی ہال میں ان کے اہل خانہ اور حکام نے خوش آمدید کہا۔زخمی کارکنوں کو فوری طور پر ایئرپورٹ پر موجود ایمبولینسوں کے ذریعے طبی امداد کے لیے منتقل کیا گیا۔بعد ازاں تمام کارکنوں کو مزید طبی معائنے اور قانونی کارروائی کے لیے استنبول فرانزک میڈیسن انسٹیٹیوٹ لے جانے کی توقع ظاہر کی گئی ہے، جہاں استغاثہ کی جانب سے تحقیقات جاری ہیں۔