گابالا میں 15واں عالمی میوزک فیسٹیول اختتام پذیر، مختلف ممالک کے فنکاروں کی شرکت

گابالا( کلچرل ڈیسک) حیدر علییف فاؤنڈیشن کے زیر اہتمام، وزارت ثقافت کے تعاون اور عزیر حاجی بیلی باکو اکیڈمی آف میوزک اور "گیلان" کی معاونت سے منعقد ہونے والا 15واں عالمی موسیقی میلہ گابالا میں شاندار اختتامی کنسرٹ کے ساتھ اختتام پذیر ہوگیا۔فیسٹیول میں آذربائیجان کے علاوہ جرمنی، روس، آسٹریا، قازقستان، نیدرلینڈز، ازبکستان اور ویتنام کے موسیقاروں اور فنکاروں نے بھی شرکت کی۔منتظمین کے مطابق اس میلے کا مقصد مختلف ثقافتوں کے درمیان رابطے اور مکالمے کو فروغ دینا تھا، جس کے تحت گابالا شہر نے دنیا بھر سے تعلق رکھنے والے ممتاز فنکاروں اور ثقافتی شخصیات کے اجتماع کے لیے اہم پلیٹ فارم کا کردار ادا کیا۔اختتامی تقریب میں عزیر حاجی بیلی کے نام سے منسوب آذربائیجان اسٹیٹ سمفنی آرکسٹرا نے خصوصی موسیقی پیش کی، جس کی قیادت اعزازی فنکار فواد ابراہیموف نے کی۔کنسرٹ میں معروف فنکاروں آزر زینالوف (ٹینر)، سمیر جعفروف (ٹینر)، اعزازی فنکارہ النارا محمدوا (سوپرانو) اور لالا مرشدلو (سوپرانو) نے اپنی شاندار پرفارمنس سے حاضرین کو محظوظ کیا۔