پاکستان کی تجارتی تاریخ میں سنگ میل: این ایل سی اور ڈی پی ورلڈ نے تاجکستان تک پہلی کامیاب کھیپ پہنچا دی

اسلام آباد(کامرس ڈیسک)پاکستان کو عالمی تجارت سے جوڑنے کے مشن میں نیشنل لاجسٹک سیل (این ایل سی) نے ایک تاریخی کامیابی حاصل کر لی ہے۔ این ایل سی اور ڈی پی ورلڈ نے متحدہ عرب امارات سے تاجکستان تک تجارتی سامان کی پہلی کامیاب ترسیل مکمل کی، جس کے تحت 38 ٹن آٹو موبائل اسپیئر پارٹس دوشنبے پہنچا دی گئی۔کھیپ جبل علی پورٹ سے کراچی پہنچی، اور دبئی سے تاجکستان کے دارالحکومت دوشنبے تک کا سفر صرف 16 دنوں میں ممکن بنایا گیا۔ این ایل سی کی جدید لاجسٹکس مہارت اور پیشہ ورانہ نظام نے اس کامیابی میں مرکزی کردار ادا کیا۔یہ اقدام خلیجی ممالک اور وسطی ایشیائی ریاستوں کے درمیان نئی تجارتی راہداری قائم کرنے کی طرف ایک اہم قدم ہے۔ ترسیل اقوامِ متحدہ کے بین الاقوامی روڈ ٹرانسپورٹ نظام (ٹی آئی آر) کے تحت کی گئی، جس سے پاکستان کی تجارتی پوزیشن مضبوط ہوئی ہے۔این ایل سی وسطی ایشیائی ریاستوں کو پاکستانی بندرگاہوں تک مختصر ترین اور محفوظ راستہ فراہم کر رہی ہے، اور اس منصوبے کے تحت 100 ملین ڈالر کی غیر ملکی سرمایہ کاری پاکستان میں لائی جا رہی ہے۔ اس کامیابی سے پاکستان کے بڑھتے ہوئے تجارتی کردار کو عالمی سطح پر تسلیم کرایا گیا ہے۔