معاشی اصلاحات سے معیشت میں بہتری، ڈیجیٹل سرمایہ کاری مستقبل کا کلیدی ہتھیار ہے:وفاقی وزیر خزانہ

اسلام آباد…وفاقی وزیر خزانہ محمد اورنگزیب نے کہا ہے کہ حکومت کی معاشی اصلاحات کے نتیجے میں ملکی معیشت بہتری کی جانب بڑھ رہی ہے اور وقت کے تقاضوں کے مطابق نئی ترجیحات پر کام کیا جا رہا ہے۔اسلام آباد میں ایک تقریب سے خطاب کرتے ہوئے وزیر خزانہ نے کہا کہ پاکستان کی آبادی کا 10 سے 15 فیصد حصہ پہلے ہی ڈیجیٹل کاروبار سے فائدہ اٹھا رہا ہے جبکہ مستقبل میں ڈیجیٹل اثاثوں کی اہمیت اور ان میں سرمایہ کاری کا رجحان مزید تیز ہو گا۔انہوں نے اس بات پر زور دیا کہ تاجروں اور سرمایہ کاروں کے لیے سہولت کاری حکومت کی اولین ترجیح ہے اور سرمایہ کاری کو آسان بنانے کے لیے تمام ممکنہ اقدامات کیے جا رہے ہیں۔وزیر خزانہ کا کہنا تھا کہ ڈیجیٹل سرمایہ کاری نہ صرف تیز اور کم لاگت ہے بلکہ اس میں شفافیت بھی زیادہ ہے، اسی لیے اس شعبے میں بہتر ریگولیشنز اور سخت شفافیت ناگزیر ہے۔انہوں نے اعتراف کیا کہ پاکستان کا بینکنگ نظام دنیا کے کئی ممالک کی نسبت زیادہ پیچیدہ ہے، جسے جدید تقاضوں کے مطابق سادہ اور مثر بنانے کی ضرورت ہے تاکہ ملکی معیشت مزید مستحکم ہو سکے۔