صدر رجب طیب ایردوان نے کہا ہے کہ ترکیہ ایک اہم تبدیلی اور اقتصادی ترقی کی راہ پر گامزن ہے۔ انہوں نے انقرہ میں اپنی سیاسی جماعت جسٹس اینڈ ڈویلپمنٹ پارٹی کی آٹھویں کانگریس سے خطاب کرتے ہوئے اس بات پر زور دیا کہ ترکیہ کو دہشت گردی اور تشدد کی لعنت سے نجات حاصل کرنا ضروری ہے۔ ایردوان نے کہا، “جب ہمارے ملک اور خطے سے دہشت گردی کا خاتمہ ہو گا، تو وہ دن قریب ہیں جب ہم ترک، کرد اور عرب اکٹھے ہو کر دہشت گردی کی دیوار کو گرا دیں گے، جو ہمارے بچوں کے خون سے جڑی ہوئی ہے۔” انہوں نے مزید کہا کہ یہ تبدیلی جمہوریت، ترقی، بھائی چارہ اور علاقائی انضمام کی نئی راہیں کھولے گی۔ صدر ایردوان نے فیتو کی سرکشی کے حوالے سے بھی بات کی اور کہا کہ اس غدار گروہ کے خلاف جنگ جاری رہے گی، چاہے وہ اندرون ملک ہو یا بیرون ملک، جب تک اس کا خطرہ مکمل طور پر ختم نہ ہو جائے۔
معاشی حوالے سے ایردوان نے کہا کہ ترکیہ میں سرمایہ کاری، پیداوار اور برآمدات کے نئے اصولوں کے تحت ڈالر میں قومی آمدنی میں 6 گنا اضافہ ہوا ہے۔ انہوں نے کہا، “ہم نے ترکیہ کو عالمی معیشت میں ٹریلین ڈالرز والی معیشتوں کی صف میں شامل کیا ہے۔ ترکیہ ایک بڑی تبدیلی اور اقتصادی ترقی کے قریب ہے۔ ہمارے خطے میں ہونے والی ترقی سے مرکزی بینک کی سہولتیں بحال ہوں گی، اور افراط زر میں تیزی سے کمی آئے گی۔”ایردوان نے یہ بھی ذکر کیا کہ ترکیہ دنیا بھر میں بغیر پائلٹ فضائی گاڑیوں کی پیداوار میں سب سے آگے ہے اور دفاعی صنعت کی برآمدات میں گیارہویں نمبر پر ہے۔ ان کا کہنا تھا کہ ترکیہ صدی کے اصلاحاتی پروگرام کے ذریعے اپنی ترقی کی صلاحیت اور پیداواری طاقت کو بڑھا رہا ہے، جس سے یہ عالمی بینک کے اعلیٰ درمیانی آمدنی والے ممالک میں شامل ہو گا اور بالآخر اعلیٰ آمدنی والے ممالک کی صف میں پہنچ جائے گا۔
