ترک حکام نے استنبول میں ایک بڑی کارروائی کرتے ہوئے دبئی میں اسرائیلی-مولدوان ربی (مذہبی رہنما) کے قتل میں ملوث تین ملزمان کو گرفتار کر لیا ہے۔ 28 سالہ ٹزوی کوگن، جو دبئی میں کوشر سپر مارکیٹ کا انتظام کرتا تھا، گزشتہ ہفتے قتل ہو گیا تھا۔ اسرائیل کے وزیرِ اعظم نے اسے نفرت انگیز دہشت گرد حملہ قرار دیا۔
دبئی کی حکام نے تفتیش کے دوران تین ازبک شہریوں کو ملزم کے طور پر شناخت کیا، جو ترکیہ فرار ہو گئے تھے۔ ترک قومی انٹیلی جنس ادارے (MIT) نے ملزمان کی استنبول آمد کو ٹریک کیا اور پولیس کی مدد سے انہیں گرفتار کیا۔ گرفتار ہونے والوں میں 28 سالہ علیمبے طاہیرووچ، 28 سالہ محمودجان عبد الرحیم، اور 33 سالہ عزیزبیک کمیلووچ شامل ہیں۔
ترکیہ نے ان ملزمان کو متحدہ عرب امارات کے حوالے کر دیا ہے، جس پر اماراتی وزارت خارجہ نے ترکیہ کا شکریہ ادا کیا۔ اسرائیل نے اس قتل کے بعد امارات میں اپنے شہریوں کو غیر ضروری سفر سے گریز کرنے کی تنبیہ کی ہے۔
