ترک اور جرمن وزرائے خارجہ کی ایران کی جنگ ختم کرنے پر بات چیت

استنبول(تر کیہ خبر) ترک وزیر خارجہ حاکان فیدان نے اپنے جرمن ہم منصب یوہان وادیفول کے ساتھ ایران میں جاری جنگ کے حوالے سے ٹیلیفون پر گفتگو کی۔ذرائع کے مطابق دونوں وزراء نے جنگ ختم کرنے کی کوششوں پر تبادلہ خیال کیا، جو 28 فروری کو امریکا اور اسرائیل کے ایران پر مشترکہ حملے کے بعد شروع ہوئی تھی۔ ایران نے اس کے جواب میں ڈرون اور میزائل حملے کیے، جن سے اسرائیل کے علاوہ اردن، عراق اور خلیجی ممالک میں امریکی فوجی اڈوں کو بھی نشانہ بنایا گیا، جس کے نتیجے میں جانی نقصان اور انفراسٹرکچر کو نقصان پہنچا اور عالمی مارکیٹوں اور ہوابازی پر اثرات مرتب ہوئے۔حاکان فیدان مشرق وسطیٰ میں جنگ ختم کرنے کے لیے سفارتی کوششیں کر رہے ہیں اور انہوں نے اس سے قبل ایران کے عباس عراقچی، امریکا اور یورپی یونین کے حکام کے ساتھ الگ الگ رابطے کیے ہیں تاکہ خطے میں امن قائم کیا جا سکے۔