ترکیہ، امریکہ اور ایران کے درمیان تناؤ کو کم کرنے کے لیے سفارتی کوششیں جاری رکھے گا:ایردوان

انقرہ( ترکیہ خبر) صدر رجب طیب ایردوان نے کہا ہے کہ ترکیہ، امریکہ اور ایران کے درمیان تناؤ کو کم کرنے کے لیے سفارتی کوششیں جاری رکھے ہوئے ہے اور مذاکرات ممکن ہیں۔ سعودی عرب اور مصر کے دوروں کے بعد ترکیہ واپسی کی پرواز میں صحافیوں سے گفتگو کرتے ہوئے ایردوان نے کہا کہ انقرہ خطے کو مزید تنازعات اور افراتفری میں دھکیلنے سے روکنے کے لیے کام کر رہا ہے۔ترک صدر نے بتایا کہ انہوں نے امریکی صدر ڈونلڈ ٹرمپ اور ایرانی صدر مسعود پزیشکیان سے بات چیت کی ہے، جبکہ استنبول میں ایک سہ فریقی اجلاس بھی ہوا جس میں ترک اور ایرانی وزرائے خارجہ شامل تھے۔ایردوان نے کہا کہ ایران میں عسکری مداخلت کی مخالفت واضح طور پر ظاہر کی گئی اور تمام فریقین سفارت کے لیے گنجائش تلاش کر رہے ہیں، جسے انہوں نے مثبت پیش رفت قرار دیا۔صدر ایردوان نے زور دیا کہ مسائل جنگ کے ذریعے نہیں بلکہ مذاکرات اور مفاہمت سے حل ہوتے ہیں، اور بڑھتی عسکری کشیدگی کے دوران گفت و شنید کی میز قائم کرنا اہم ہے۔