ترکیہ ایران کشیدگی کم کرنے کے لیے ثالثی کرے گا: ایردوان

استنبول( ترکیہ خبر) ترکیہ کے صدر رجب طیب ایردوان نے استنبول میں ایران کے وزیر خارجہ عباس عراقچی سے ملاقات کی، جس میں دوطرفہ تعلقات اور خطے کی موجودہ صورتحال پر تبادلۂ خیال کیا گیا۔صدارتی مواصلاتی ڈائریکٹوریٹ کے مطابق ملاقات میں ترک وزیر خارجہ حاقان فیدان بھی شریک تھے، تاہم گفتگو کی مزید تفصیلات جاری نہیں کی گئیں۔قبل ازیں، وزیر خارجہ حاقان فیدان نے اپنے ایرانی ہم منصب عباس عراقچی کے ساتھ علیحدہ ملاقات کی، جس کے بعد مشترکہ پریس کانفرنس میں انہوں نے امریکہ پر زور دیا کہ وہ ایران کے خلاف کسی بھی ممکنہ فوجی کارروائی کے لیے اسرائیلی دباؤ کو مسترد کرے۔ فیدان نے واضح کیا کہ انقرہ ایران کے خلاف فوجی مداخلت کی مخالفت کرتا ہے اور ایران سے متعلق مسائل کے پرامن، داخلی اور عوام کی مرضی سے حل کی حمایت کرتا ہے۔ایرانی وزیر خارجہ کا یہ دورہ ایسے وقت میں ہوا جب ترکیہ تہران اور واشنگٹن کے درمیان ثالثی کی سفارتی کوششیں تیز کر رہا ہے۔ اس پیش رفت کا مقصد کشیدگی کم کرنا اور سیاسی حل کے لیے راہ ہموار کرنا ہے، خاص طور پر اس مرحلے پر جب امریکی صدر ڈونلڈ ٹرمپ نے ایران کے خلاف فوری فوجی کارروائی کے خدشات کے حوالے سے اپنے بیانات میں نسبتی نرمی دکھائی ہے۔واضح رہے کہ دسمبر کے اواخر میں ایران میں معاشی مسائل کے خلاف احتجاج اور اس کے بعد کریک ڈاؤن کے باعث تہران اور واشنگٹن کے درمیان کشیدگی میں اضافہ ہوا تھا۔ صدر ٹرمپ نے جمعہ کو بحری افواج کی نقل و حرکت کا حوالہ دیتے ہوئے کہا کہ ایران واشنگٹن کے ساتھ ممکنہ معاہدے میں دلچسپی رکھتا ہے۔