بزرگوں کی فلاح، عزت اور مفت سفری سہولتیں جاری ہیں: مریم نواز

لاہور( تر کیہ خبر) وزیراعلیٰ پنجاب مریم نواز شریف نے کہا ہے کہ حکومت بزرگ شہریوں کی عزت، بہبود اور سہولت کے لیے مختلف اقدامات کر رہی ہے۔بزرگ افراد کے عالمی دن کے موقع پر اپنے پیغام میں انہوں نے بزرگ شہریوں کو خراجِ تحسین پیش کرتے ہوئے ان کی صحت اور سلامتی کے لیے نیک خواہشات کا اظہار کیا۔مریم نواز نے کہا کہ بزرگ اپنے تجربات، قربانیوں اور مشاہدات کے باعث نئی نسل کے لیے قیمتی رہنمائی کا ذریعہ ہیں۔ ان کا احترام ہماری تہذیب اور دینی اقدار کا اہم حصہ ہے، اس لیے ان کے حقوق کی حفاظت اور خدمت ہماری ذمہ داری ہے۔انہوں نے کہا کہ بزرگوں کو وہ عزت اور مقام ملنا چاہیے جس کے وہ مستحق ہیں اور انہیں کسی صورت نظرانداز نہیں کرنا چاہیے۔وزیراعلیٰ کے مطابق پنجاب حکومت بزرگ شہریوں کے لیے قائم رہائشی مراکز میں سہولیات بہتر بنا رہی ہے۔ ان مراکز میں مقیم بعض بزرگ مرد و خواتین کو حج کی سعادت بھی حاصل ہوئی، جبکہ برقی بسوں میں بزرگ افراد کو مفت سفر کی سہولت فراہم کی جا رہی ہے۔مریم نواز نے نوجوانوں پر زور دیا کہ وہ اپنے بزرگوں کا احترام کریں، ان کی خدمت کریں اور انہیں بھرپور عزت دیں۔