ملک کے خلاف منظم معلوماتی اور پروپیگنڈا مہم چلائی جا رہی ہے:آذربائیجان حکام

باکو( ترکیہ خبر) آذربائیجان کی قومی اسمبلی کی غیر ملکی مداخلت اور ہائبرڈ خطرات کے خلاف قائم عارضی کمیٹی نے ایک بیان جاری کرتے ہوئے کہا ہے کہ ملک کے خلاف منظم معلوماتی اور پروپیگنڈا مہم چلائی جا رہی ہے۔آذربائیجان کی سرکاری خبر رساں ایجنسی AZƏRTAC کے مطابق کمیٹی نے اپنے بیان میں کہا ہے کہ حالیہ دنوں میں ایک مربوط مہم کے تحت آذربائیجان اور آذربائیجان و آرمینیا کے درمیان امن ایجنڈے کو نشانہ بنایا جا رہا ہے۔بیان میں کہا گیا ہے کہ مختلف ممالک میں سرگرم بعض آرمینیائی لابنگ گروپس، مخصوص میڈیا ادارے اور بعض بااثر افراد اس مہم کا حصہ ہیں، جو ایک ہی بیانیے کو فروغ دے رہے ہیں۔کمیٹی کے مطابق یہ مہم مختلف موضوعات جیسے نام نہاد نسل کشی کے الزامات، جنگی قیدیوں اور خانکندی میں تعمیراتی سرگرمیوں کے گرد مرکوز ہے۔ مزید کہا گیا کہ اس پروپیگنڈا کو منظم رکھنے کے لیے خفیہ رابطہ ذرائع، ای میلز اور انکرپٹڈ میسجنگ پلیٹ فارمز استعمال کیے جا رہے ہیں۔بیان میں یہ بھی کہا گیا ہے کہ امریکہ، یورپ اور روس میں موجود آرمینیائی لابنگ تنظیمیں اس مہم میں زیادہ سرگرم کردار ادا کر رہی ہیں۔سوشل میڈیا پلیٹ فارم ایکس کے ایک ہفتے کے تجزیے کے مطابق تقریباً 130 اکاؤنٹس کے ذریعے 220 سے زائد پوسٹس کی گئیں جنہیں قریباً دس لاکھ ردعمل حاصل ہوئے، اور یہ سرگرمی زیادہ تر آرمینیائی بلاگرز اور ان کے حامی غیر ملکی صارفین کے ذریعے کی گئی۔