باکو میں او آئی سی ممالک کا انسدادِ بدعنوانی اجلاس، عالمی تجربات پر تبادلہ خیال

باکو ( تر کیہ خبر) آذربائیجان کے دارالحکومت باکو میں اسلامی تعاون تنظیم (او آئی سی) کے رکن ممالک کے انسدادِ بدعنوانی کے اداروں کے سربراہان کا تیسرا اعلیٰ سطحی اجلاس منعقد ہوا، جس کا اہتمام آذربائیجان کے دفترِ استغاثہ نے کیا۔اجلاس کے دوران آذربائیجان کے دفترِ استغاثہ اور سعودی عرب کے نگران و انسدادِ بدعنوانی ادارے (نزاہہ) کے اشتراک سے ’’بدعنوانی کی پیمائش میں بہتری: عالمی اقدام کے تحت پیشرفت اور قومی نقطہ نظر‘‘ کے موضوع پر خصوصی نشست بھی ہوئی۔نشست میں بدعنوانی کی پیمائش کے حوالے سے بین الاقوامی تجربات، قومی جائزہ نظام کو بہتر بنانے اور انسدادِ بدعنوانی پالیسیوں کے نتائج کا غیر جانب دارانہ معیار پر تعین کرنے کے امور زیر بحث آئے۔اجلاس سے سعودی عرب کے نگران و انسدادِ بدعنوانی ادارے، اقوام متحدہ کے ترقیاتی پروگرام، بین الاقوامی انسدادِ بدعنوانی اکیڈمی، گلوب ای نیٹ ورک اور آذربائیجان کے دفترِ استغاثہ کے ماتحت انسدادِ بدعنوانی کے مرکزی شعبے کے نمائندوں نے خطاب کیا۔آذربائیجان کے دفترِ استغاثہ کے نمائندوں نے ملک میں بدعنوانی کی صورتحال کے مسلسل تجزیے، اعدادوشمار اور فوجداری مقدمات کی تحقیقات کے ذریعے بدعنوانی کے اسباب اور حالات کی نشاندہی اور ان کے خاتمے کے لیے متعلقہ سرکاری اداروں کو سفارشات پیش کرنے کے تجربات سے آگاہ کیا۔انہوں نے انسدادِ بدعنوانی اقدامات کی افادیت جانچنے، 2022 سے 2026 کے قومی لائحہ عمل پر عمل درآمد، 2027 سے 2029 کے لیے نئے قومی لائحہ عمل کی تیاری اور بدعنوانی کے خطرات کا جائزہ لینے کے قومی نظام کی تشکیل کے لیے جاری کاموں پر بھی روشنی ڈالی۔